Live Updates

کراچی ، پولیس کارروائی ،کالعدم ٹی ٹی پی کے 2دہشت گرد گرفتار ،دستی بم برآمد

دونوں دہشت گرد افغانستان سے جسمانی اور اسلحے کے استعمال کی مکمل تربیت حاصل کر کے آئے تھے

منگل 24 اگست 2021 17:12

کراچی ، پولیس کارروائی ،کالعدم ٹی ٹی پی کے 2دہشت گرد گرفتار ،دستی بم ..

کراچی (اُردو پوائنٹ اخبارتازہ ترین - این این آئی۔ 24 اگست2021ء) کراچی پولیس نے ابراہیم حیدری کے علاقے میں خفیہ اطلاع پر کارروائی کرتے ہوئے کالعدم تحریک طالبان پاکستان کے 2دہشت گردوں کو گرفتار کرکے دستی بم برآمد کرلیے ہیں ۔تفصیلات کے مطابق پولیس نے ابراہیم حیدری انٹیلی جنس اطلاع پر کارروائی کے دوران کالعدم تحریک طالبان پاکستان کے 2دہشت گردوں نعمت اللہ عرف بابا اور پیر اللہ ولد شالا میر خان کو گرفتار کرکے ان کے قبضے سے 2دستی بم برآمد کرلیے ہیں ۔

گرفتار دہشت گردوں کا تعلق جنوبی وزیرستان سے ہے اور دونوں دہشت گرد افغانستان سے جسمانی اور اسلحے کے استعمال کی مکمل تربیت حاصل کر کے آئے تھے۔گرفتار دہشتگرد نعمت اللہ عرف بابا کے والد اور دو بھائی بھی کالعدم ٹی ٹی پی سے وابستہ تھے۔

(جاری ہے)

ملزم کے دو بھائیوں میں سے برکت اللہ گرفتار ہو کر جیل میں ہے اور دوسرا بھائی امان اللہ عرف منو 2014 میں پولیس کیساتھ مقابلے کے دوران ہلاک ہو گیا تھا۔

گرفتار دہشتگرد نے مہتاب عرف برادر نامی شخص کو مخبری کے شبے میں ٹارگٹ کلنگ کا نشانہ بنایا۔ملزم نے مہتاب کو ٹارگٹ کرنے کیلئے حکیم اللہ محسود کیجانب سے احکامات جاری ہونے کا انکشاف کیا۔شہری مہتاب عرف برادر کی ہلاکت کا مقدمہ نمبر 420/2011 تھانہ سہراب گوٹھ میں درج کیا گیا تھا۔گرفتار دہشتگرد پیراللہ ولد شالا میر خان کو مہتاب نامی شخص کی ٹارگٹ کلنگ کیلئے ریکی کرنے کی ذمہ داری سونپی گئی تھی۔دونوں دہشتگرد کراچی میں بھتہ خوری، قربانی کی کھالیں جمع کرنے اور طالبان مخالف لوگوں کی تفصیلات اکھٹی کر کے قیادت تک پہنچانے کا کام سرانجام دیتے تھے۔گرفتار دہشتگردوں سے پوچھ گچھ جاری ہے، مزید گرفتاریاں اور انکشافات متوقع ہیں۔