Live Updates

پاکستان میں بڑے بڑے مافیاز قانون کی بالادستی نہیں چاہتے، یہ کہتے ہیں ہمیں این آر او دو

کچھ لوگ اربوں روپے کی جائیدادوں میں بیرون ملک بیٹھے ہوئے ہیں، ماضی کے حکمرانوں نے ملکی نظام کومضبوط نہیں ہونے دیا، تیزی سے بڑھتی آبادی کو روکنے کیلئے اقدامات کرنا ہوں گے،وزیراعظم عمران خان کاکاشتکاروں میں کسان کارڈ تقسیم کرنے کی تقریب سے خطاب

فیضان ہاشمی جمعرات 23 ستمبر 2021 14:41

پاکستان میں بڑے بڑے مافیاز قانون کی بالادستی نہیں چاہتے، یہ کہتے ہیں ..

اسلام آباد (اردو پوائنٹ تازہ ترین اخبار ۔ 23 ستمبر 2021ء ) وزیراعظم عمران خان کا کہنا ہے کہ پاکستان میں بڑے بڑے مافیاز قانون کی بالادستی نہیں چاہتے، یہ کہتے ہیں ہمیں این آر او دو۔ کچھ لوگ اربوں روپے کی جائیدادوں میں بیرون ملک بیٹھے ہوئے ہیں۔ رسیدیں دینے کی بجائے باہر بیٹھ کر تقریریں کی جا رہی ہیں۔ ماضی کے حکمرانوں نے ملکی نظام کومضبوط نہیں ہونے دیا۔

تفصیلات کے مطابق ڈیرہ اسماعیل خان میں کاشتکاروں میں کسان کارڈ تقسیم کرنے کی تقریب سے خطاب کرتے ہوئے وزیراعظم کا کہنا تھا پاکستان ایک زرخیز ملک ہے اس کے باوجود گزشتہ سال 40 لاکھ ٹن گندم درآمد کی، آبادی بڑھتی رہی اور اناج کی پیداوار نہ ہوئی تومستقبل میں بھوک ہوگی۔ تیزی سے بڑھتی آبادی کو روکنے کیلئے اقدامات کرنا ہوں گے۔

(جاری ہے)

50 سال بعد ملک میں ڈیم بن رہےہیں، ہمیں زراعت پر تحقیق کی ضرورت اور اس شعبے میں جدید ٹیکنالوجی کا استعمال ضروری ہے۔

حکومت بنیادی تعلیم و صحت کے فروغ کیلئے اقدامات کر رہی ہے۔ عمران خان نے کہا کہ مافیاز ملک میں رائج کرپٹ سسٹم سے فائدہ اٹھا رہے ہیں، کچھ اربوں روپے کی جائیدادوں میں بیرون ملک بیٹھے ہوئے ہیں۔ ماضی کے حکمرانوں نے ملکی نظام کومضبوط نہیں ہونے دیا۔ ملکی ترقی کیلئے اگلے انتخابات نہیں، اگلی نسل کا سوچنا ہو گا۔ ہماری حکومت نے ملک میں مزید 10 ڈیم بنانے کا منصوبہ بنایا ہے، پاکستان میں زیتون کی کاشت کا انقلاب آ رہا ہے۔

یورپ میں الیکشن میں دھاندلی کی سوچ بھی نہیں ہے، ہمیں مضبوط قوم بننے کے لیے کردار کی ضرورت ہے۔ دنیا کی تاریخ پڑھی ہے، ریاست مدینہ میرے ایمان کا حصہ ہے،اس کے اصول بڑے انقلابی تھے،ان لوگوں میں سے نہیں جو اسلام کو ذاتی مفادات کے لیے استعمال کرتے ہیں،دین کی پیروی نہ کرنے کی وجہ سے ہمارے حالات ابتر ہیں۔