Live Updates

پاک فوج کے لیفٹیننٹ جنرل ندیم انجم نئے ڈی جی آئی ایس آئی تعینات

وزیراعظم عمران خان کے دستخط کے بعد ڈی جی آئی ایس آئی کی تقرری کا نوٹیفکیشن جاری، لیفٹیننٹ جنرل ندیم انجم 20نومبر 2021 کو عہدے کا چارج سنبھالیں گے

ثنااللہ ناگرہ منگل 26 اکتوبر 2021 17:45

پاک فوج کے لیفٹیننٹ جنرل ندیم انجم نئے ڈی جی آئی ایس آئی تعینات

اسلام آباد (اُردو پوائنٹ اخبارتازہ ترین۔ 26 اکتوبر2021ء) پاک فوج کے لیفٹیننٹ جنرل ندیم احمد انجم کو ڈی جی آئی ایس آئی تعینات کردیا گیا ہے، ڈی جی آئی ایس آئی کی تقرری کا نوٹیفکیشن جاری کردیا گیا ہے۔ وزیراعظم آفس کے مطابق پاک فوج کے لیفٹیننٹ جنرل ندیم انجم کو باقاعدہ ڈائریکٹر جنرل انٹر سروسز انٹیلی جنس( ڈی جی آئی ایس آئی) تعینات کردیا گیا ہے۔

وزیراعظم عمران خان کے دستخط کے بعد ڈی جی آئی ایس آئی کی تقرری کا نوٹیفکیشن جاری کردیا ہے۔ لیفٹیننٹ جنرل فیض حمید 19 نومبر تک بطور ڈی جی آئی ایس آئی کام جاری رکھیں گے، لیفٹیننٹ جنرل ندیم انجم کے باقاعدہ چارج سنبھالنے کے بعد موجودہ ڈی جی آئی ایس آئی لیفٹیننٹ جنرل فیض حمید کورکمانڈر پشاور کا عہدہ سنبھال لیں گے۔

(جاری ہے)

اس سے قبل وزیراعظم عمران خان سے آرمی چیف جنرل قمر جاوید باجوہ کی علیحدگی میں اہم ملاقات ہوئی، ملاقات بنی گالا میں وزیراعظم عمران خان کی رہائشگاہ پر ہوئی، ملاقات میں پاک فوج کے پیشہ وارانہ امور پربات چیت کی گئی، بعدازاں ملاقات میں ڈی جی آئی ایس آئی لیفٹیننٹ جنرل فیض حمید بھی شامل ہوگئے۔

مزید برآں وزیراعظم عمران خان کی زیرصدارت اہم اجلاس بھی ہوا۔ اجلاس میں اعلیٰ عسکری و سیاسی حکام کی شرکت کی۔ اجلاس میں ملکی سیکیورٹی اورقومی سلامتی کا جائزہ لیا گیا، وزیرداخلہ نے ملکی سیکیورٹی صورتحال پر بریفنگ دی۔ اجلاس میں کالعدم جماعت سے متعلق بھی اہم فیصلوں پر مشاورت کی گئی۔