Live Updates

حکومت نے پٹرول پر عائد سیلز ٹیکس ختم کر دیا

وزیراعظم عمران خان نے پاکستان میں پہلی بار پٹرول پر سیلز ٹیکس 17 کی بجائے صفر کردیا ہے: وزیر مملکت اطلاعات و نشریات فرخ حبیب

محمد علی منگل 16 نومبر 2021 22:45

اسلام آباد(اُردو پوائنٹ اخبارتازہ ترین۔ 16 نومبر2021ء) حکومت نے پٹرول پر عائد سیلز ٹیکس ختم کر دیا۔ تفصیلات کے مطابق وزیر مملکت اطلاعات و نشریات فرخ حبیب نے کہا ہے کہ ‏وزیراعظم عمران خان نے پاکستان میں پہلی بار پٹرول پر سیلز ٹیکس 17فیصد کی بجائے صفر کردیا ہے۔

وزیراعظم عمران خان نے پاکستان میں پہلی بار پٹرول پر سیلز ٹیکس 17% کیبجائے صفر کردیا ہے۔
پٹرولیم کی قیمتوں میں عالمی سطح پر100%اضافہ کے باوجود حکومت نے عوامی ریلیف کے لیے سینکڑوں ارب کی ٹیکس آمدن کا نقصان کیا
ن لیگ عالمی قیمتیں کم ہونےکےباوجود پٹرول پرزیادہ ٹیکس وصول کرتی تھی pic.twitter.com/5ytA6bXCMm
— Farrukh Habib (@FarrukhHabibISF) November 16, 2021

وزیر مملکت اطلاعات و نشریات نے اپنے ایک ٹویٹ میں کہا کہ پٹرولیم مصنوعات کی قیمتوں میں عالمی سطح پر 100 فیصد اضافہ ہوا، اس اضافہ کے باوجود حکومت نے عوامی ریلیف کے لیے سینکڑوں ارب روپے کی ٹیکس آمدن کا نقصان کیا، جبکہ ن لیگ عالمی قیمتیں کم ہونے کےباوجود پٹرول پرزیادہ ٹیکس وصول کرتی تھی۔

واضح رہے کہ وزیراعظم نے گزشتہ روز پٹرولیم مصنوعات کی قیمتیں برقرار رکھنے کا فیصلہ کیا تھا۔

(جاری ہے)

وزارت خزانہ نے 16 نومبر سے پیٹرولیم مصنوعات کی قیمتیں برقرار رکھنے کا نوٹیفکیشن جاری کیا، جس کے تحت وزیراعظم نے پٹرولیم مصنوعات کی قیمتیں بڑھانے کی سمری مسترد کردی ، اوگرا نے پیٹرول اور ڈیزل کی قیمتوں میں ساڑھے5 روپے فی لیٹر اضافے کی سمری وزارت خزانہ کو ارسال کی تھی، وزارت خزانہ نے پیٹرول اور ڈیزل کی قیمت میں ساڑھے5 روپے اضافے کی سمری وزیراعظم کو ارسال کی تھی۔

وزیراعظم نے سمری مسترد کرتے ہوئے ہدایت کی کہ سیلز ٹیکس کی ایڈجسٹمنٹ کا معاملہ کابینہ کو بھیجا جائے گا۔ گزشتہ روز کے فیصلے کے بعد منگل کے روز وزیراعظم نے اپنے ایک بیان میں کہا کہ وزیراعظم عمران خان نے پھر پٹرولیم مصنوعات کی قیمتیں بڑھنےکا خدشہ ظاہرکردیا ۔ وزیر اعظم کے مطابق مہنگائی کا سیلاب باہر سے آیا ہوا ہے، تین ماہ میں تیل کی قیمتیں دگنی ہوگئی ہیں، تیل مزید قیمتیں بڑھنے کا بھی خدشہ ہے، مہنگائی کا بحران سردیوں تک ہے۔