جنرل (ر) مرزا اسلم بیگ سے منسوب آڈیو کلپ جعلی ہے

آڈیو کلپ پروپیگنڈے کا حصہ ہے، جعلی آڈیو کلپ ریاستی اداروں کے خلاف ڈس انفارمیشن مہم ہے، سابق آرمی چیف سے منسوب جعلی آڈیو کلپ سے متعلق آئی ایس پی آر کا بیان

محمد علی بدھ 13 اپریل 2022 21:50

راولپنڈی(اُردو پوائنٹ اخبارتازہ ترین۔ 13 اپریل2022ء) آئی ایس پی آر کے مطابق جنرل (ر) مرزا اسلم بیگ سے منسوب آڈیو کلپ جعلی ہے۔ تفصیلات کے مطابق پاک فوج کے شعبہ تعلقات عامہ آئی ایس پی آر کی جانب سے سابق آرمی چیف جنرل (ر) مرزا اسلم بیگ سے منسوب سوشل میڈیا پر گردش کرنے والے آڈیو کلپ سے متعلق وضاحتی بیان جاری کیا گیا ہے۔ اے آر وائی نیوز کے مطابق آئی ایس پی آر کی جانب سے جاری کردہ بیان میں کہا گیا ہے کہ جنرل (ر) مرزا اسلم بیگ سے منسوب آڈیو کلپ جعلی ہے، آڈیو کلپ پروپیگنڈے کا حصہ ہے۔

آئی ایس پی آر کے مطابق جعلی آڈیو کلپ ریاستی اداروں کے خلاف ڈس انفارمیشن مہم ہے۔ دوسری جانب اس حوالے سے سابق آرمی چیف کی جانب سے خود بھی بیان جاری کیا گیا ہے۔ جنرل ریٹائرڈ اسلم بیگ نے کہا ہے کہ اپنے حوالے سے فوج اور فوج کی اعلیٰ قیادت کیخلاف مذموم اور بے ہودہ بیانات کی تردید کرتاہوں ۔

(جاری ہے)

اپنے بیان میں انہوں نے کہاکہ میرے حوالے سے فوج اور فوج کی اعلیٰ قیادت کے خلاف جو مذموم اور بے ہودہ بیانات فری میڈیا پر آرہے ہیں میں اس کی مذمت اور تردید کرتاہوں ۔

انہوں نے کہاکہ فوج میری پہنچان ہے ، میری شان ہے ، اس کا ایک ایک سپاہی ، ایک ایک افسر میرے لئے قابل احترام ہے ، اس کے خلاف بات کر نا اور اس کی شان کیخلاف بات کر نا میرے لئے بد اخلاقی تصور ہوتی ہے ، اس فوج نے مجھے یہ پہچان دی ہے جب تک اللہ نے زندگی دی ہے اس کی شان میں میرادماغ ، میرا دل اور زبان حق بات کہتے رہیں گے ۔ انہوں نے کہاکہ میرے بچو!ہماری فوج کیخلاف جو تحریک چل رہی ہے وہ ہمارے دشمنوں کی سازش ہے اس سازش کا حصہ نہ بنو ، اپنے پاک اور صاف کر دار و عمل کو داغدار نہ بنائو ، ایسی باتوں کو اللہ تعالیٰ پسند نہیں کرتا ۔