وزیرِ اعظم محمد شہباز شریف کی زیر صدارت حالیہ بارشوں و سیلاب کے نقصانات اور امدادی اقدامات پر جائزہ اجلاس ، وزارت آبی وسائل کو متاثرہ علاقوں میں واٹر سپلائی کا نظام بحال کرنے میں خیبرپختونخوا حکومت کو مکمل معاونت فراہم کرنے کی ہدایت

اسلام آباد (اُردو پوائنٹ اخبارتازہ ترین - اے پی پی۔ 22 اگست2025ء) وزیرِ اعظم محمد شہباز شریف نے وزارت آبی وسائل کو متاثرہ علاقوں میں واٹر سپلائی کا نظام بحال کرنے میں خیبرپختونخوا کی صوبائی حکومت کو مکمل معاونت فراہم کرنے کی ہدایت کرتے ہوئے کہا ہے کہ حالیہ بارشوں وسیلاب سے متاثرہ لوگوں کی مدد قومی فریضہ ہے، ریسکیو و امداد کے بعد ان کی بحالی کا کام شروع کیا جائے گا۔

ان خیالات کا اظہار انہوں نے جمعہ کو یہاں حالیہ بارشوں و سیلاب کے نقصانات اور جاری امدادی اقدامات پر جائزہ اجلاس کی صدارت کے دوران کیا۔ وزیراعظم آفس کے میڈیا ونگ سے جاری بیان کے مطابق وزیراعظم نے وزارت آبی وسائل کو ہدایت کی کہ متاثرہ علاقوں میں واٹر سپلائی کا نظام بحال کرنے میں خیبرپختونخوا کی صوبائی حکومت کی مکمل معاونت کی جائے۔

(جاری ہے)

وزیراعظم نے کہا کہ حالیہ بارشوں وسیلاب سے متاثرہ لوگوں کی مدد قومی فریضہ ہے، متاثرین کے ریسکیو و امداد کے بعد ان کی بحالی کا کام شروع کیا جائے گا، دریاؤں، ندی نالوں اور پانی کی قدرتی گزرگاہوں کے گرد تعمیرات کو روکنے کیلئے قومی سطح پر مہم چلائیں گے۔ وزیرِ اعظم نے متاثرہ علاقوں میں جہاں جہاں امدادی کارروائیاں جاری ہیں وہاں متعلقہ وفاقی وزراء اور سیکرٹریز کو بھیجنے کی ہدایت کی۔

انہوں نے متوقع دو سپیلز کے حوالے سے خطرے سے دوچار آبادیوں کو پیشگی آگاہی فراہم کرنے کی بھی ہدایت کی۔ وزیرِ اعظم نے حکم دیا کہ گلگت بلتستان میں گزشتہ رات گلیشئیر پھٹنے سے نکلنے والے ملبے سے بنی جھیل کی کڑی نگرانی کی جائے اور ممکنہ طور پر متاثر ہونے والے علاقوں میں لوگوں کا انخلاء یقینی بنایا جائے۔ وزیراعظم نے چیئرمین این ڈی ایم اے کو اس جھیل کی نگرانی اور بنا کسی نقصان کے پانی کے اخراج کیلئے پاک فوج اور ایف سی این اے کے انجینئرز کی خدمات لینے کی بھی ہدایت کی۔

اجلاس کو ملک کے بالائی و جنوبی حصوں میں متوقع بارشوں کے حوالے سے آگاہ کیا گیا۔ اجلاس کو دریاؤں کی صورتحال اور گلیشئیرز کے حوالے سے بھی آگاہی دی گئی۔ اجلاس کو وزیرِ اطلاعات و نشریات نے ریسکیو و امدادی سرگرمیوں کی کوآرڈینیشن کیلئے قائم کردہ سینٹرل کوآرڈینیشن کمیٹی کے حوالے سے بھی آگاہ کیا ۔اجلاس میں وفاقی وزراء احسن اقبال، ڈاکٹر مصدق ملک، انجینئر امیر مقام، عبدالعلیم خان، سردار اویس خان لغاری، عطاء اللہ تارڑ، میاں محمد معین وٹو، مشیر وزیرِ اعظم رانا ثناء اللہ، معاون خصوصی مبارک زیب، چیئرمین این ڈی ایم اے لیفٹیننٹ جنرل انعام حیدر ملک اور متعلقہ اعلیٰ حکام نے شرکت کی۔