مسلم لیگ (ن) نے ماضی میں بھی کاٹلنگ کی عوام کے لیے سوئی گیس پائپ لائن منصوبے کی منظوری دی ، امیر مقام

کاٹلنگ(اُردو پوائنٹ اخبارتازہ ترین - این این آئی۔ 21 فروری2023ء) مشیر وزیراعظم برائے سیاسی و عوامی امور، قومی ورثہ و ثقافت ڈویڑن اور صدر مسلم لیگ (ن) خیبر پختونخوا، انجینئر امیر مقام نے کہا ہے کہ مسلم لیگ (ن) نے ماضی میں بھی کاٹلنگ کی عوام کے لیے سوئی گیس پائپ لائن منصوبے کی منظوری دی تاکہ یہاں کا یہ دیرینہ مسئلہ حل ہو سکے،پی ٹی آئی نے صوبے بھر میں ایسے بیشتر ترقیاتی منصوبوں کو زیر التوا رکھا مگر وزیراعظم شہباز شریف کی قیادت میں مسلم لیگ (ن) نے عوام کی فلاح کو اولین ترجیح سمجھا اور آج کاٹلنگ کی عوام کے لیے یہ تحفہ لائی ہے۔

ان خیالات کا اظہار مشیرِ وزیراعظم نے کاٹلنگ میں منعقدہ ورکرز کنونشن کے موقع پر عوام کے جمع غفیر سے خطاب کرتے ہوئے کیا۔مشیر نے کہا کہ یہ منصوبہ رحیم اللہ یوسفزئی (مرحوم) کی کوششوں کے نتیجے میں قائد نواز شریف نے خود منظور کروایا اور اس پر کام شروع کیا مگر پی ٹی آئی نے اس پر کام بند کروا کر عوام کو اس تحفے سے محروم کر دیا۔

(جاری ہے)

انہوںنے کہاکہ بہت جلد کاٹلنگ کی عوام اس منصوبے سے مستفید ہو نگے۔

مشیر نے کہا کہ ملک میں تمام لوگوں کے لیے ایک جیسا قانون ہونا چاہیے، جیلوں میں موجود قیدیوں میں مایوسی پھیل گئی اور رات آٹھ بجے کسی فردِ واحد کی حاضری کیلئے اعلیٰ عدالت کا کھلنا قابل افسوس ہے۔ مشیر نے کہا کہ ایک آئین شکن صدر، وزیراعظم، اسپیکر اور ڈپٹی اسپیکر کے لیے الگ قانون اور عوام کے لیے الگ قانون کا ہونا قابلِ افسوس ہے۔انجینئر امیر مقام نے کہا کہ آج پاکستان کی عوام کو جس مہنگائی کا سامنا ہے وہ عمران اور اس کے نااہل ٹولے کا ہی کارنامہ ہے۔

انہوں نے کہا کہ عمران کو اپنے جھوٹے بیانیوں کا حساب دینا ہوگا جو پہلے امریکی سازش کا چرچا کرتے تھے اور آج کہتے ہیں کہ کوئی سازش نہیں ہوئی۔ مشیر نے کہا کہ اب خیبر پختونخوا کی عوام کو اب مسلم لیگ ن کو آزمانا چاہیے جنہوں نے بغیر مینڈیٹ کے ان کا مقدمہ لڑا۔ ان کا کہنا تھا کہ مریم نواز 15 مارچ کو تخت بھائی، مردان میں بڑے جلسہ عام سے خطاب کریں گی۔

ورکرز کنونشن کے دوران جماعت علمائے اسلام سے صاحبزادہ افتخار باچہ، عوامی نیشنل پارٹی سے رفیع للہ اور ڈاکٹر بہادر سید نے ہزاروں ساتھیوں سمیت مسلم لیگ (ن) میں شمولیت اختیار کی۔انجینئر امیر مقام نے اپنے خطاب سے پہلے تحصیل کاٹلنگ کے 26 گاؤں میں سوئی گیس ڈسٹری بیوشن نیٹورک اور سپلائی کے منصوبوں کا افتتاح کیا جن میں شموزو، بابوزئی، میاں خان،سنگاؤ، عالم گنج، چر چوڑ، ڈھیری،لکپانی قاسمی،تازہ گرام/ سروبی، مددخان بانڈہ، اًلو، شاہ آباد، جنگا، خان شریف بانڈہ/ استمبول بانڈہ، بہار بانڈہ غنڈو چوک/ حجیان/ اِنزرگی/ سواتیان، غالہ/ پیرانو کلے اور لنڈے شاہ/ پرانا متہ شامل ہیں۔