Live Updates

پولیس پر گولی چلے گی تو جواب گولی سے دیا جائے گا، آئی جی پنجاب

پولیس پر حملہ کرنے والے کو پسپا ہی نہیں کرنا بلکہ ان کا قلع قمع کرنا ہے، کسی جگہ دہشت گرد ہو تو نہیں چھوڑا جائے گا، آئی جی پنجاب کی گفتگو

دانش احمد انصاری جمعرات 23 مارچ 2023 21:10

پولیس پر گولی چلے گی تو جواب گولی سے دیا جائے گا، آئی جی پنجاب

لاہور (اُردو پوائنٹ اخبارتازہ ترین۔ 23 مارچ2023ء) آئی جی پنجاب عثمان انور کا کہنا ہے کہ پولیس پر گولی چلے گی تو جواب گولی سے دیا جائے گا۔ انہوں نے کہا کہ پولیس پر حملہ کرنے والے کو پسپا ہی نہیں کرنا بلکہ ان کا قلع قمع کرنا ہے، کسی جگہ دہشت گرد ہو تو نہیں چھوڑا جائے گا۔ آئی جی پنجاب کا کہنا تھا عمران خان کے الزامات کا ہر سطح پر سامنا کرنے کے لیے تیار ہیں، جوڈیشل کمیشن ہو یا کسی سطح پر تحقیقات، اپنی ٹیم کے ساتھ جواب دیں گے، پولیس والے قصور وار نکلے تو سزا دیں ورنہ الزام لگانے والےکو سزا دیں۔

آئی جی پولیس پنجاب عثمان انور کا پولیس لائنز میں خطاب کرتے ہوئے کہنا تھا عمران خان کے پولیس پر لگائے گئے الزامات میں کوئی سچائی نہیں ہے، عمران خان کو قتل کرنے کی کوئی منصوبہ بندی نہیں کی گئی، ہم کسی بھی شہری کو نقصان پہنچانے کا سوچ بھی نہیں سکتے۔

(جاری ہے)

عثمان انور کا کہنا تھا ، پولیس کے شہداء، جہیز فنڈ اور دوسرے ویلفیئر کے فنڈ ڈبل کر دیے ہیں، سی سی پی او لاہور بلال کمیانہ کا کام تعریف کے قابل ہے، سی سی پی او بلال کمیانہ نے برسوں پرانی 13 ہزار اپیلیں نمٹائیں۔

یاد رہے کہ گزشتہ روز عمران خان نے ویڈیو لنک خطاب کرتے ہوئے الزام عائد کیا تھا کہ آئی جی پنجاب اور آئی جی اسلام آباد نے میرے قتل کا منصوبہ بنایا ہے، ان لوگوں نے زمان ٹاؤن میں گھس کر قتل کامنصوبہ بنایا ہے، مجھے مرتضیٰ بھٹو کی طرح قتل کیا جا سکتا یے۔