لیگی سینیٹر کا حکومت کو پی ٹی آئی سے مذاکرات اور آئین کے مطابق الیکشن کرانے کا مشورہ

جب مودی کو مذاکرات کی پیشکش کر سکتے ہیں تو آپس میں کیوں بات نہیں کر سکتے،حکومت پی ٹی آئی سے آئین اور شیڈول کے مطابق الیکشن کے رول آف گیمز طے کرے۔مشاہد حسین کا سینیٹ میں اظہار خیال

مقدس فاروق اعوان جمعہ 7 اپریل 2023 14:51

لیگی سینیٹر کا حکومت کو پی ٹی آئی سے مذاکرات اور آئین کے مطابق الیکشن ..

اسلام آباد(اردوپوائنٹ اخبارتازہ ترین۔ 07 اپریل 2023ء) مسلم لیگ ن کے سینیٹر مشاہد حسین نے حکومت کو پی ٹی آئی سے مذاکرات اور آئین کے مطابق الیکشن کرانے کا مشورہ دے دیا۔انہوں سینیٹ میں اظہارِ خیال کرتے ہوئے کہا کہ اداروں سے لڑئی تو جیتی نہیں جا سکتی، جب مودی کو مذاکرات کی پیشکش کر سکتے ہیں تو آپس میں کیوں بات نہیں کر سکتے۔سینیٹر مشاہد حسین نے کہا حکومت پی ٹی آئی سے آئین اور شیڈول کے مطابق الیکشن کے رول آف گیمز طے کرے، حکومت اور پی ٹی آئی غیر ضروری لڑائی سے گریز کریں۔

انتخابات کے لیے آئین پر عمل تو کرنا ہو گا، یہی حل ہے۔لیگی سینیٹر کا کہنا تھا کہ ہم سپریم کورٹ سے اور پی ٹی آئی فوج سے غیر ضروری لڑائی میں مصروف ہیں۔پاکستان کے اندر قومی اتحاد کی ضرورت ہے۔مودی کو مذاکرات کا کہتے ہیں۔

(جاری ہے)

طالبان سے بات کرنے کو تیار ہیں تو پی ٹی آئی سے کیوں نہیں؟۔ملک کے لیے اندرونی معاملات پر بات چیت کرنا ہو گی۔کبھی کسی پر الزام لگا رہے ہیں کبھی کسی پر۔

دوسری جانب پیپلز پارٹی سے تعلق رکھنے والے دو ماہرین قانون اعتزاز احسن اور لطیف کھوسہ نے حکومتی موقف غلط قرار دے دیا۔بدھ کو پیپلز پارٹی کے ماہرین قانون نے قومی اسمبلی میں قانون سازی اور یکم مارچ کے فیصلے پر حکومتی موقف کو غلط قرار دیا ہے۔ نجی ٹی وی سے گفتگو میں اعتزاز احسن نے کہا کہ ازخود نوٹس آئینی اختیار ہے، جسے محض قانون سازی سے محدود نہیں کیا جاسکتا۔

انہوں نے کہا کہ یہ قانون سازی موثر بہ ماضی بھی نہیں ہوسکتی۔اعتزاز احسن نے کہا کہ یکم مارچ کا فیصلہ تین دو کا ہے، جو جج بینچ کا حصہ ہی نہیں تھے وہ اپنی رائے شامل نہیں کر سکتے۔لطیف کھوسہ نے کہا کہ ازخود نوٹس کیس میں اپیل کا حق سادہ قانون سازی سے نہیں دیا جاسکتا۔انہوں نے کہا کہ 5 ججوں نے تین دو سے فیصلہ سنایا، جو بینچ کا حصہ نہیں ان کی رائے شامل نہیں ہوسکتی۔