پی ٹی آئی رہنما سمیرا ملک کا پارٹی سے علیحدگی کا اعلان

ملتان (اردوپوائنٹ اخبارتازہ ترین۔ 24 جولائی 2023ء) پی ٹی آئی جنوبی پنجاب کی سینیئرنائب صدرسمیراملک نے پارٹی سے علیحدگی کا اعلان کردیا۔ سمیرا ملک نے کہا کہ 9 مئی کو قومی تنصیبات اور اداروں پر حملے کیے گئے اس کی مذمت کرتی ہوں۔ سمیرا ملک سابق وزیراعلیٰ پنجاب عثمان بزدار کے دور میں ترجمان حکومت پنجاب رہ چکی ہیں۔ ادھر سابق وزیراعلیٰ خیبرپختونخوا پرویز خٹک نے چیئرمین پی ٹی آئی کے دو مزید اہم رہنماء اپنے قافلے میں شامل کر لیے ۔

9 مئی کے سانحے کے بعد تحریک انصاف کی وکٹیں گرنے کا سلسلہ جاری ہے،پنجاب میں استحکام پاکستان پارٹی میں1سو سے زائد ارکان قومی وصوبائی اسمبلی شامل ہوئے ہیں جبکہ خیبر پختونخوا میں پاکستان تحریک انصاف پارلیمنیٹریز میں57سے زائد سابق ارکان شامل ہوگئے ہیں۔

(جاری ہے)

ذرائع کے مطابق پاکستان تحریک انصاف کے دو مزید اہم رہنماء ملک واجد اور ارباب وسیم نے پرویز خٹک کی پارٹی میںشمولیت کا اعلان کر دیا۔

سربراہ پی ٹی آئی پی پرویز خٹک نے ارباب وسیم اور ملک واجد کو پارٹی میں شامل ہونے پر خوش آمدید کہا ہے۔ خیال رہے کہ آج سے چند روز قبل پاکستان تحریک انصاف (پی ٹی آئی) کے رہنما نجیب ہارون نے بھی پارٹی چھوڑنے کا اعلان کر دیا۔ کراچی میں میڈیا سے گفتگو کرتے ہوئے نجیب ہارون نے کہا کہ میری 27 سال سیاسی جدوجہد رہی ہے، 9 مئی کے واقعے نے ملکی امیج کو خراب کیا۔

نجیب ہارون کا کہنا تھا کہ ان واقعات نے ہماری سیاست کو بھی تقسیم کیا، 16 اپریل 2020 کو میں نے مشکل فیصلہ کرتے ہوئے اسمبلی سے استعفیٰ دیا تھا۔انہوں نے کہا کہ 18مارچ 2022 کو میں نے میڈیا کے سامنے وزیرِ اعظم کو کرسی چھوڑنے کا مشورہ دیا تھا، میں نے چیئرمین پی ٹی آئی سے کہا تھا کہ وہ کسی اور کو وزیرِ اعظم بننے کا موقع دیں۔