بلدیاتی اداروں کے منتخب نمائندے عوام کے مسائل کے حل کے لیے اپنا بھرپور کردار ادا کریں، بلاول بھٹو

پیر 2 اکتوبر 2023 21:20

کراچی (اُردو پوائنٹ اخبارتازہ ترین - اے پی پی۔ 02 اکتوبر2023ء) پاکستان پیپلز پارٹی کے چیئرمین بلاول بھٹو زرداری نے کہا ہے کہ بلدیاتی اداروں کے منتخب نمائندے عوام کے مسائل کے حل کے لیے اپنا بھرپور کردار ادا کریں،پاکستان پیپلز پارٹی وہ واحد جماعت ہے، جو الیکشن کے لیے تیار ہے۔ عوام کو ایسے لیڈروں کو پہچانے جو الیکشن سے بھاگ رہے ہیں ،چیئرمین بلاول بھٹو زرداری نے سانحہ کارساز کی 16 ویں برسی ملک بھر میں ضلعی سطح پر بھرپور انداز میں منانے کا اعلان کیا ۔

میڈیا سیل بلاول ہاوَس کی جانب سے جاری کردہ پریس ریلیز کے مطابق بلاول بھٹو زرداری نے بلاول ہاوَس میں سندھ بھر کے بلدیاتی انتخابات میں کامیاب ہونے والے پی پی پی امیدواروں سے ملاقات کی۔ اس موقع پر خطاب کرتے ہوئے انہوں نے بلدیاتی اداروں کے منتخب نمائندوں پر زور دیا کہ وہ عوام کے مسائل کے حل کے لیے اپنا بھرپور کردار ادا کریں۔

(جاری ہے)

اپنی رِٹ قائم کریں، عوام سے روابط میں تیزی لائیں۔

چیف الیکشن کمشنر اور نگران وزیراعلیٰ اچھی ساکھ رکھنے والے لوگ ہیں، ہم امید رکھتے ہیں کہ وہ انصاف کے ساتھ اپنے فرائض منصبی ادا کریں گے۔آئندہ عام انتخابات کے حوالے سے بات کرتے ہوئے پی پی پی چیئرمین نے کہا کہ پاکستان پیپلزپارٹی الیکشن کے لیے تیار ہے۔ پاکستان پیپلز پارٹی وہ واحد جماعت ہے، جو الیکشن کے لیے تیار ہے۔ انہوں نے مزید کہا کہ عوام کو ایسے لیڈروں کو پہچاننا چاہیے کہ وہ کون ہیں جو الیکشن سے بھاگ رہے ہیں۔

انہوں نے کہا کہ جب تک الیکشن کی تاریخ کا نوٹیفکیشن جاری نہیں ہوتا، ہم چین سے نہیں بیٹھیں گے۔چیئرمین بلاول بھٹو زرداری نے کہا کہ آج عوام کو روٹی، کپڑا، مکان کی سخت ضرورت ہے، اور عوام کو پاکستان پیپلز پارٹی سے امیدیں وابستہ ہیں۔ انہوں نے مزید کہا کہ سب محنت کریں گے تو پاکستان پیپلزپارٹی کی جیت ہوگی، جو عوام کے مسائل کا حل چاہتی ہے۔ اس موقع پر پی پی پی شعبہ خواتین کی مرکزی صدر فریال تالپور، پی پی پی سندھ کے صدر نثار احمد کھوڑو، جنرل سیکریٹری سینیٹر وقار مہدی، سیکرٹری اطلاعات عاجز دھامراہ اور سندھ کے سابق وزرائے اعلی سید قائم علی شاہ اور سید مراد علی شاہ بھی موجود تھے۔