Live Updates

نوازشریف کی وطن واپسی سے پاکستان کی سیاست یکسرتبدیل ہوگئی،قائدنے ڈیل نہیں خدمت سے ملک وقوم کا مستقبل سنوارا، سیماجیلانی

الیکشن میں اترنے کیلئے تیارہیں ،عمران نیازی کو القادر ٹرسٹ سمیت تمام جرائم کا حساب دینا ہوگا،سینئر رہنما پاکستان مسلم لیگ(ن) راولپنڈی

منگل 14 نومبر 2023 20:25

اسلام آباد(اُردو پوائنٹ اخبارتازہ ترین - این این آئی۔ 14 نومبر2023ء) پاکستان مسلم لیگ(ن) راولپنڈی کی سنیئر رہنما و سابق رکن قومی اسمبلی سیما جیلانی نے کہاہے کہ قائد میاں نوازشریف کی وطن واپسی سے پاکستان کی سیاست یکسرتبدیل ہوگئی ہے، اُن کی بڑھتی ہوئی مقبولیت مخالفین سے ہضم نہیں ہورہی، سابق وزیراعظم کی وطن واپسی پر شاندار استقبال نے سیاسی مخالفین کی مقبولیت کے دعوئوں کی ہوا نکال دی ہے، قائدمیاں نوازشریف نے ڈیل کرکے نہیں خدمت کرکے ملک قوم کا مستقبل سنوارا اب بھی سنواریں گے،میاں نوازشریف عوامی عدالت سے بھی سرخرو ہوچکے ہیں او رقانونی عدالت سے بھی مرحلہ وار سرخروہو رہے ہیں۔

انہوں نے کہاکہ مسلم لیگ(ن) انتخابی میدان میں اترنے کیلئے تیار ہے، قائد میاں نوازشریف بہت جلد انتخابی جلسوں کا آغاز کرنے جا رہے ہیں ،انشاء اللہ ملک بھر میں مسلم لیگ(ن) کامیاب پاورشو کرکے سیاسی مخالفین کی مقبولیت کے غبارے کی رہی سہی ہوابھی نکال دے گی۔

(جاری ہے)

مسلم لیگی رہنماسیماجیلانی نے مزید کہاکہ کرسی اقتدار پر بیٹھ کر کل تک جو مغرور شخص کہتاتھاکہ میں کسی کو این آر او نہیںدونگا آج خود این آر او کیلئے اپنی پارٹی کے وفد کو سیاسی جماعتوں کے دروازوں تک بھیج رہاہے اور این آر اوکیلئے بھیک مانگ رہاہے مگر اسے کسی صورت این آر او نہیں ملے گا،عمران نیازی کو القادر ٹرسٹ سمیت تمام جرائم کا حساب دینا ہوگا۔

انہوں نے کہاکہ عام انتخابات میں عوام صرف اور صرف مسلم لیگ(ن) کو ووٹ کی طاقت سے ایوان اقتدار تک پہنچائیں گے،قائد میاں نوازشریف ایک بارپھر ملک کے وزیراعظم بن کر ملک کو بحرانوں سے نکالیں گے،سابق وزیراعظم کو کبھی بھی پانچ سال تک اقتدار میں رہنے دیاگیا لیکن پھر بھی انہوں نے ہر بار ملک کو معاشی ترقی کی راہ پر گامزن کیا، اُن کی قیادت میں پاکستان اقوام عالم میں وہ مقام حاصل کرے گی جس کا پاکستان صحیح معنوں میں حقدار ہے۔انہوںنے کہاکہ اب االزام تراشی کی روش کو ترک کرنا ہوگا،سیاسی جماعتیں اپنے رویوںمیںلچک کا مظاہرہ کریں، سیاست میں مذاکرات اور مکالمے کے دروازے بند نہیں کئے جاتے اس سے حالات میں بیگاڑ پیدا ہوتاہے۔