پاکستانی اسکول نے کوپ 28 کانفرنس میں ایک لاکھ ڈالر کا انعام جیت لیا

زید سسٹین ایبلٹی ایوارڈ کی دوڑ میں جنوبی ایشیا ریجن سے بھارت اور بنگلادیش کے اسکول بھی شامل تھے جن میں سے پاکستانی اسکول کورٹ فاتح قرار پایا

دانش احمد انصاری اتوار 3 دسمبر 2023 23:04

پاکستانی اسکول نے کوپ 28 کانفرنس میں ایک لاکھ ڈالر کا انعام جیت لیا

دبئی ( اُردو پوائنٹ اخبارتازہ ترین ۔ 03 دسمبر 2023ء ) پاکستانی اسکول نے کوپ 28 کانفرنس میں بھارت کو شکست دے کر جنوبی ایشیا کے بہترین سکول اور ایک لاکھ ڈالر کا انعام جیت لیا۔ میڈیا رپورٹس کے مطابق کوپ 28 کانفرنس میں زید سسٹین ایبلٹی ایوارڈ کی دوڑ میں جنوبی ایشیا ریجن سے بھارت اور بنگلادیش کے اسکول بھی شامل تھے جن میں سے پاکستانی اسکول کورٹ فاتح قرار پایا۔

آزاد کشمیر میں واقع کورٹ اسکول اینڈ کالج کی طالبات سمعیہ اور کنزیٰ نے دبئی ایکسپو سٹی میں تقریب کے دوران متحدہ عرب امارات کے صدر شیخ محمد بن زاید سے ایوارڈ وصول کیا۔ اس موقع پر نگراں وزیراعظم پاکستان انوار الحق کاکڑ سمیت دیگر ممالک کے سربراہان بھی موجود تھے۔ دریں اثنا پاکستان کے نگراں وزیراعظم انوار الحق کاکڑ نے ایوارڈ وصول کرنے والی طالبات کنزیٰ اور سمعیہ سے ملاقات کرکے انہیں مبارکباد پیش کی۔

(جاری ہے)

انہوں نے کہا کہ آپ دونوں نے پاکستان، اپنے والدین اور ہم سب کا سر فخر سے بلند کیا ہے۔ انہوں نے کہا کہ اہم آرگینک فارمنگ کے ذریعے اپنے اسکول میں کچن گارڈن بھی بنانا چاہتے ہیں تاکہ بچوں کو نامیاتی طور پر اگائی جانے والی خوراک سے غذائیت حاصل ہو سکے۔ ہم چاہتے ہیں کہ اسکول میں بچے صاف پانی کو محفوظ کرنے کا طریقہ سیکھیں۔ انوار الحق کاکڑ نے کہا کہ جب فاتح کیلئے پاکستان کے نام اعلان ہوا تو میرا بس نہیں چل رہا تھا کہ سربراہان مملکت کی صف سے اٹھ کر زور سے پاکستان زندہ باد کا نعرہ لگاؤں۔

پاکستان کا اصل مستقبل یہی نوجوان ہیں جنہوں نے ملک کو آگے بڑھانا ہے۔ ایوارڈ کیلئے چھ کیٹیگریز میں دنیا بھر سے گیارہ فاتحین کا انتخاب ستمبر میں جیوری کے ایک پینل نے کیا تھا۔ کورٹ اسکول اینڈ کالج 2016 میں اُن بچوں کے لیے قائم کیا گیا تھا جو 2005 کے تباہ کن زلزلے میں یتیم ہو گئے تھے۔ یہاں 500 سے زائد طلباء زیر تعلیم ہیں۔ یہ اسکول کشمیر آرفن ریلیف ٹرسٹ (KORT) کے زیر انتظام ہے۔ ٹرسٹ نے اس اکتوبر میں صوابی میں ایک اور اسکول بھی کھولا ہے جس میں 450 بچے رہ سکتے ہیں۔ گزشتہ کئی سالوں سے KORT یتیم بچوں کو تعلیم، بورڈنگ کی سہولیات، خوراک، کپڑے اور طبی دیکھ بھال کے ساتھ مدد فراہم کر رہا ہے۔