بھارتی سپریم کورٹ کا فیصلہ اقوام متحدہ کی قرارداوں کے منافی ہے، شہبازشریف

پیر 11 دسمبر 2023 16:39

لاہور (اُردو پوائنٹ اخبارتازہ ترین - اے پی پی۔ 11 دسمبر2023ء) سابق وزیراعظم اور مسلم لیگ (ن) کے صدر شہبازشریف نے بھارت کے غیر قانونی زیر تسلط جموں وکشمیر سے متعلق بھارتی سپریم کورٹ کے فیصلہ کو مسترد کرتے ہوئے کہا کہ5 اگست 2019 کی طرح بھارتی سپریم کورٹ کے فیصلے کی بھی کوئی حیثیت نہیں۔ اپنے ایک بیان میں شہباز شریف نے کہا کہ بھارتی سپریم کورٹ کا فیصلہ اقوام متحدہ کی قرارداوں کے منافی ہے۔

اس لئے یہ فیصلہ عالمی قوانین کی خلاف ورزی ہے۔ یہ فیصلہ دیکر بھارتی سپریم کورٹ نے عالمی جرم کیا ہے۔انہوں نے کہا کہ عالمی قانون، سلامتی کونسل کی قراردادیں جموں وکشمیر کو متنازعہ خطہ اور مسئلہ تسلیم کرتی ہیں۔انہوں نے کہا کہ عالمی قانون سلامتی کونسل کی قراردادوں کو بھارتی سپریم کورٹ یا بھارتی حکومت کے کسی ایسے اقدام کے تحت ختم نہیں کرسکتا۔

(جاری ہے)

شہباز شریف نے کہا کہ جموں وکشمیرعالمی سطح پر مسلمہ تنازعہ ہے۔بھارتی سپریم کورٹ کے کہنے سے اٹوٹ انگ کا جھوٹ سچ نہیں ہوجائے گا،بھارتی سپریم کورٹ نے بی جے پی کی پالیسی پرایک کارکن بن کر عمل کیا۔ انہوں نے کہا کہ بھارتی سپریم کورٹ اس سے قبل بابری مسجد پر بھی کھلی لاقانونیت کرچکی ہے،یہ فیصلہ کشمیریوں کی قربانیوں کو ختم نہیں کر سکتا۔

ایسے متعصب فیصلے سے جدو جہد آزادی کشمیر میں تیزی آئے گی،5 اگست 2019 کے بعدبھی سلامتی کونسل اپنے اجلاس میں تنازعہ جموں وکشمیر کی متنازعہ مسلمہ عالمی حیثیت کا اعادہ کرچکی ہے۔ شہباز شریف نے کہا کہ اسلامی تعاون تنظیم (اوآئی سی) بھی اپنے اجلاسوں، قراردادوں اور اعلامیوں کے ذریعے جموں وکشمیر کے متنازعہ ہونے کو تسلیم کرچکی ہے،بھارتی ظلم وجبر،5 اگست 2019 اور بھارتی سپریم کورٹ کے عالمی قوانین کے منافی فیصلوں سے کشمیریوں کو ان کی آزادی سے محروم نہیں کیاجاسکتا۔

انہوں نے کہا کہ ایسے ہتھکنڈوں سے دنیا کی آنکھوں میں دھول جھونکی جاسکتی ہے نہ ہی جموں وکشمیر پر عالمی پوزیشن تبدیل ہوگی،بھارت اپنے غیر قانونی زیر تسلط جموں وکشمیر پر اپنے قبضے کو طول دینے کیلئے عالمی قوانین اور اقوام متحدہ کی قراردادوں کی خلاف ورزی کر رہا ہے،بھارت اوچھے ہتھکنڈے چھوڑ کر تنازعہ جموں وکشمیر کے منصفانہ اور سلامتی کونسل کی قراردادوں کے مطابق حل کی سنجیدہ کوششوں کی طرف آئے۔