مقبوضہ کشمیر میں ’’یوم پاکستان ‘‘پر مبارکباد کے پیغامات والے پوسٹر چسپاںکیے جانے کا سلسلہ جاری

جمعہ 22 مارچ 2024 23:02

سرینگر (اُردو پوائنٹ اخبارتازہ ترین - این این آئی۔ 22 مارچ2024ء) بھارت کے غیر قانونی زیر قبضہ جموںوکشمیر میں سری نگر اور دیگر علاقوں میں ہفتہ کو منائے جانے والے ’’یوم پاکستان‘‘ سے قبل مبارکباد کے پیغامات والے پوسٹر چسپاں کیے جانے کا سلسلہ جاری رہے۔کشمیر میڈیا سروس کے مطابق سری نگر اور مقبوضہ وادی کشمیر کے دیگر علاقوں کے علاوہ جموں خطے کے ڈوڈہ میں کل جماعتی حریت کانفرنس اور دیگر آزادی پسند تنظیموں کی طرف سے دیواروں، کھمبوں ،ستوں وغیرہ پر چسپاں پوسٹروں میں قائد اعظم محمد علی جناح کا معروف فرمان’’کشمیر پاکستان کی شہ رگ ہے ‘‘ اور معروف حریت قائد شہید سید علی گیلانی کا مشہور نعرہ’’ہم پاکستانی ہیں ، پاکستان ہمار اہے‘‘ درج ہیں۔

پوسٹروں میں مصور پاکستان علامہ محمد اقبال ؒ، بانی پاکستان قائداعظم محمد علی جناحؒ ،شہید ملت لیاقت علی خانؒ اور آرمی چیف جنرل سید عاصم منیر کی تصاویر موجود ہیں۔

(جاری ہے)

پوسٹروں میں لکھا ہے’’جموں و کشمیر کے لوگ غیر قانونی بھارتی قبضے سے آزادی چاہتے ہیں، جموں و کشمیر پاکستان کا حصہ ہے ،بھارت نے کشمیر کو فوجی چھاؤنی میں تبدیل کر دیا ہے، کشمیری اپنے حق خودارادیت پر کبھی سمجھوتہ نہیں کریں گے۔پوسٹروں کے ذریعے پاکستانی عوام اور حکومت کو یوم پاکستان کی مبارکباد دیتے ہوئے مملکت خداداد کی دن دوگنی رات چوگنی ترقی کیلئے دعا کی گئی۔