پنجاب کے مختلف شہروں میں بارش، کئی علاقوں میں بجلی کی فراہمی معطل

آئندہ 24گھنٹوں کے دوران مختلف شہروں میں گرج چمک کیساتھ بارش کا امکان

جمعہ 26 جولائی 2024 22:13

لاہور (اُردو پوائنٹ اخبارتازہ ترین - آن لائن۔ 26 جولائی2024ء) لاہور سمیت پنجاب کے مختلف شہروں میں بارش کے بعد حبس اور گرمی کا زور ٹوٹنے سے موسم خوشگوار ہوگیا جبکہ کئی علاقوں میں بجلی کی فراہمی بھی معطل ہوگئی،صوبائی دارالحکومت لاہور میں بارش اور تیز ہوائوں کے سبب فلائٹ آپریشن شدید متاثر ہو گیا جس کی وجہ سے پروازیں ملتان اور پشاور منتقل کر دی گئیں ، محکمہ موسمیات نے آئندہ 24گھنٹوں کے د وران ملک کے مختلف شہروں میں تیزہوائوں اور گرج چمک کے ساتھ بارش کا امکان ظاہر کر دیا ۔

تفصیلات کے مطابق لاہور میں کہیں ہلکی اور کہیں تیز بارش کے بعد حبس اور گرمی کا زور ٹوٹنے سے موسم خوشگوار ہوگیا۔کئی علاقوں میں موسلادھار بارش سے شاہراہوں پر پانی جمع ہوگیا جس سے شہریوں کو مشکلات کا سامنا کرنا پڑا، رات گئے ہونے والی بارش کے ساتھ ہی ضلعی انتظامیہ، واسا افسران و ملازمین نکاس آب کے لیے متحرک نظر آئے۔

(جاری ہے)

واسا لاہور کی طرف سے بارش کا ریکارڈ جاری کر دیا گیا جس کے مطابق لاہور کے علاقے لکشمی چوک میں سب سے زیادہ 95ملی میٹر بارش ریکارڈ کی گئی جبکہ جیل روڈ پر 63ملی میٹر، گلبرگ میں 65اور اپر مال میں 50ملی میٹر بارش ریکارڈ کی گئی ہے۔

اس کے علاوہ مغلپورہ میں 66، تاجپورہ میں 46ملی میٹر، نشتر ٹائون میں 62، چوک نا خدا میں 61، پانی والا تالاب میں 89، فرخ آباد میں 66، گلشن راوی میں 78، اقبال ٹائون میں 76ملی میٹر، سمن آباد میں 56ملی میٹر، جوہر ٹائون میں 44اور قرطبہ چوک میں 90 ملی میٹر بارش ریکارڈ کی گئی ۔ایم ڈی واسا غفران احمد نے نکاسی آب آپریشن ٹیم کے ہمراہ مختلف علاقوں کا دورہ کیا جبکہ ڈپٹی کمشنر لاہور رافعہ حیدر بھی لمحہ بہ لمحہ نکاسی آب کے لیے مانیٹرنگ کرتی رہیں۔

ایم ڈی واسا نے تمام ہیوی مشینری کو زیر استعمال لاتے ہوئے شہر بھر کی میں شاہراہوں کو کلیئر کروا دیا۔پنجاب کے دیگر شہروں گوجرانوالہ اور حافظ آباد سمیت مختلف مقامات پر بھی جم کر بادل برسے۔بارش کے بعد مختلف علاقوں میں بجلی فراہمی معطل ہوگئی جس کی وجہ سے عوام کو مشکلات کا سامنا کرنا پڑا ۔پنجاب کے مختلف علاقوں میں بارشوں اور موسمی خرابی کی وجہ سے لاہور کا فلائٹ آپریشن کئی گھنٹے تک متاثر رہا۔محکمہ موسمیات کے مطابق آئندہ 24گھنٹوں کے دوران شیخوپورہ، ساہیوال، سرگودھا، خوشاب، فیصل آباد، جھنگ، ٹوبہ ٹیک سنگھ، نورپورتھل، میانوالی، بھکر، لیہ، ڈیرہ غازی خان اور بہاولنگر میں چند مقامات پر تیز ہوائوں اور گرج چمک کے ساتھ بارش کا امکان ہے۔