ملک کا نام روشن کرنے والے کھلاڑی قوم کے ہیرو اور ملک کا اثاثہ ہیں: سردار سلیم حیدر خان

ّ15 گولڈ میڈل جیتنے والی سہیل سسٹرز کی ایڈون سہوترا کی قیادت میں گورنر پنجاب سے ملاقات

جمعرات 1 اگست 2024 20:30

لاہور (اُردو پوائنٹ اخبارتازہ ترین - آن لائن۔ 01 اگست2024ء) عالمی ریکارڈ رکھنے والے، پاکستان کا فخر؛ ایشین پیسفک افریقن کمبائنڈ پاور لفٹنگ چیمپئن شپ میں 15 گولڈ میڈل جیتنے والی سہیل سسٹرز نے آج یہاں گورنر ہاؤس لاہور میں اقلیتی ونگ پنجاب کے نائب صدر ایڈون سہوترا کی قیادت میں گورنر پنجاب سردار سلیم حیدر خان سے ملاقات کی۔ اس موقع پر ٹوئنکل سہیل، ویرونیکا سہیل، سبیل سہیل، مریم سہیل، منیجر سہیل جاوید کھوکھر، کوچ ملک محمد راشد موجود تھے۔

ملاقات کے دوران ٹوئنکل سہیل نے اپنا گولڈ میڈل شہید بے نظیر بھٹو کے نام کرنے کا اعلان بھی کیا۔ گورنر پنجاب سردار سلیم حیدر خان نے کہا کہ سہیل سسٹرز۔ ٹوئنکل سہیل، ویرونیکا سہیل، سبیل سہیل نے ملکی تاریخ میں پہلی بار تین براعظموں کے پاور لفٹنگ مقابلے میں پاکستان کی نمائندگی کی اور 15 گولڈ میڈل حاصل کیے جو کہ ایک منفرد اعزاز تھا۔

(جاری ہے)

انہوں نے کہا کہ بین الاقوامی سطح پر ملک کا نام روشن کرنے والے کھلاڑی قوم کے ہیرو اور ملک کا اثاثہ ہیں۔

گورنر پنجاب نے مزید کہا کہ کھیل انسان کی ذہنی، جسمانی اور پیشہ ورانہ صلاحیتوں کی نشوونما میں بہت اہم ہیں۔ انہوں نے کہا کہ کھیل نوجوانوں میں برداشت، تحمل، صبر اور نظم و ضبط سمیت مختلف مثبت صلاحیتیں پیدا کرتے ہیں۔ گورنر پنجاب نے کھلاڑیوں کو مبارکباد دیتے ہوئے اس امید کا اظہار کیا کہ وہ مستقبل میں بھی اسی جذبے کے ساتھ ملک و قوم کا نام روشن کرتے رہیں گے۔

انہوں نے اس امید کا بھی اظہار کیا کہ پاور لفٹنگ ایتھلیٹس محنت کے بل بوتے پر اولمپکس کے لیے کوالیفائی کریں گے اور ملک کا نام روشن کریں گے۔ ٹوئنکل سہیل نے کہا کہ شہید بینظیر بھٹو پاکستانی خواتین کے لیے رول ماڈل تھیں۔ محترمہ بے نظیر بھٹو پاکستان اور مسلم دنیا کی پہلی خاتون وزیر اعظم بنیں اور ثابت کر دیا کہ خواتین محنت اور جذبے سے معاشرے میں اعلیٰ مقام حاصل کر سکتی ہیں۔ اس موقع پر گورنر پنجاب نے کھلاڑیوں کو تعریفی اسناد دی اور ان کی کارکردگی کو سراہا۔