اسٹیبلشمنٹ نے ہمیں دھوکہ دیا، کسی بھی فریق سے مذاکرات کے دروازے بند کر رہا ہوں، عمران خان

8 ستمبر کے جلسہ کی تاریخ اور این او سی اسٹیبلشمنٹ نے دیا تھا، آج سے پارٹی کو ہدایت کر رہا ہوں اسٹیبلشمنٹ سے کوئی بات چیت نہیں کرے گا۔ جیل میں صحافیوں سے غیر رسمی گفتگو

ساجد علی منگل 10 ستمبر 2024 14:23

اسٹیبلشمنٹ نے ہمیں دھوکہ دیا، کسی بھی فریق سے مذاکرات کے دروازے بند ..

راولپنڈی ( اُردو پوائنٹ اخبارتازہ ترین۔ 10 ستمبر 2024ء ) پاکستان تحریک انصاف کے قائد عمران خان کا کہنا ہے کہ اسٹیبلشمنٹ نے ہمیں دھوکہ دیا، کسی بھی فریق سے مذاکرات کے دروازے بند کر رہا ہوں۔ اڈیالہ جیل میں صحافیوں سے غیر رسمی گفتگو کرتے ہوئے انہوں نے کہا کہ میں نے کبھی کسی کو بات چیت سے نہیں روکا، میں نے 6 پارٹی رہنماؤں کو اسٹیبلشمنٹ سے بات چیت کی اجازت دے رکھی تھی لیکن آج سے پارٹی کو ہدایت کر رہا ہوں اسٹیبلشمنٹ سے کوئی بات چیت نہیں کرے گا کیوں کہ اسٹیبلشمنٹ نے ہمیں دھوکہ دیا ہے، اس لیے میں آج سے اسٹیبلشمنٹ سمیت کسی فریق سے بھی مذاکرات کے دروازے بند کر رہا ہوں۔

سابق وزیراعظم کا کہنا ہے کہ 8 ستمبر کے جلسہ کی تاریخ اور این او سی اسٹیبلشمنٹ نے دیا تھا، علی امین گنڈاپور کو اسٹیبلشمنٹ نے اٹھایا یہ اخبارات میں چھپا ہے، ایک صوبے کے وزیراعلی کو اٹھا کر آپ نفرتیں بڑھا رہے ہیں، ہمیں اجازت ملے یا نہ ملے 21 ستمبر کو لاہور میں جلسہ کریں گے۔

(جاری ہے)

صحافی نے جب سوال کیا کہ ’علی امین گنڈاپور کے بیانات سے بغاوت کا تاثر جاتا ہے کہ آپ بغاوت کی ترغیب دے رہے ہیں؟‘، اس پر عمران خان نے جواب دیا کہ ہم نے کون سی بغاوت کی ہے؟ علی امین گنڈا پور نے قوم کے جذبات کی ترجمانی کی ہے، میں علی امین گنڈا پور کے ساتھ کھڑا ہوں ،علی امین گنڈا پور کے بیان پر معافی مانگنے والا بزدل ہے، اسے پارٹی میں نہیں ہونا چاہیئے وہ پارٹی چھوڑ دے‘۔

اس موقع پر سابق وزیراعظم سے سوال ہوا کہ ’فیصل واوڈا نے الزام لگایا ہے کہ ارشد شریف قتل کے پلاٹ میں آپ، جنرل فیض اور مراد سعید شامل تھے؟‘، جواب دیتے ہوئے قائد پی ٹی آئی نے کہا کہ فیصل واوڈا ان کا ماؤتھ پیس ہے اور یہ سب کو پتا ہے، ٹھیک ہے آپ ارشد شریف قتل کیس کا اوپن ٹرائل کر لیں تو سب سامنے آجائے گا‘۔