نسداددہشت گردی ونگ نے شیر شاہ پولیس مقابلے سے متعلق تفصیلات جاری کر دیں

دہشت گردوں کے 2 ساتھیوں کو گزشتہ ماہ گرفتار کیا گیا تھا،تفتیش کے دوران دہشت گرد حافظ قاسم اور عثمان کے ٹھکانے کا علم ہوا،ترجمان سی ٹی ڈی

اتوار 6 اکتوبر 2024 17:15

کراچی(اُردو پوائنٹ اخبارتازہ ترین - این این آئی۔ 06 اکتوبر2024ء) انسداددہشت گردی ونگ نے کراچی کے علاقے شیر شاہ میں رات گئے پولیس مقابلے سے متعلق تفصیلات جاری کر دی ہیں۔سی ٹی ڈی کے ترجمان کے مطابق رات گئے پولیس مقابلے میں 2 دہشت گرد ہلاک ہوگئے، دہشت گردوں کی شناخت حافظ قاسم رشید اور عثمان قریشی کے ناموں سے ہوئی ہے۔انہوں نے بتایا کہ دہشت گردوں کے 2 ساتھیوں نعیم اور حمزہ کو گزشتہ ماہ گرفتار کیا گیا تھا، تفتیش کے دوران دہشت گرد حافظ قاسم اور عثمان کے ٹھکانے کا علم ہوا۔

(جاری ہے)

ترجمان کے مطابق مارے گئے دہشت گرد حافظ قاسم اور عثمان ڈی ایس پی علی رضا کے قتل میں ملوث تھے، ڈی ایس پی علی رضا کے قتل کی منصوبہ بند کئی ماہ قبل جیل میں کی گئی تھی۔انہوں نے کہاکہ دہشت گردوں سے اسلحہ، خودکش جیکٹ بنانے کا سامان برآمد ہوا، ملزمان سے ٹارگٹ کلنگ کی فہرست و دیگر سامان بھی برآمد ہوا ہے۔انہوں نے بتایا کہ ہلاک دہشت گرد حافظ قاسم کالعدم لشکر جھنگوی کراچی کا امیر تھا، مارے گئے دہشت گردوں کی ضلع سینٹرل کے کالعدم سپاہ صحابہ کے دہشت گرد سید احمد حسن اور دیگر نے سہولت کاری کی۔ترجمان کے مطابق ہلاک دہشت گرد حافظ قاسم رشید 12 سال بعد جیل سے رہا ہوا تھا۔