بعض عناصر جان بوجھ کر سرکاری اداروں کی کارکردگی کو خراب کررہے ہیں،میئر کراچی

کراچی (اُردو پوائنٹ اخبارتازہ ترین - این این آئی۔ 17 دسمبر2024ء)میئر کراچی بیرسٹر مرتضیٰ وہاب نے کہا ہے کہ بعض عناصر جان بوجھ کر سرکاری اداروں کی کارکردگی کو خراب کررہے ہیں، ان اداروں کو دوبارہ فعال بناکر سولر سسٹم اور پبلک پرائیویٹ پارٹنرشپ جیسے منصوبوں کے ذریعے عوام کو سہولیات فراہم کی جائیں گی، غیرقانونی قبضوں کے خاتمے، سرکاری اداروں کی بحالی اور عدالتی احکامات پر عملدرآمد کو یقینی بنایا جا رہا ہے، شاہ رسول کالونی میں نیشنل بینک نے 11 ہزار مربع گز زمین پر قبضہ کر رکھا ہے، کہیں پر کے ایم سی کا ذکرنہیں، مفت میں کسی کو کھیلنے کی اجازت نہیں دیں گے کہ 17 ہزار روپے ناظر کو جمع کرواکر اسٹے لے لیا کہ کام کرنے سے نہ روکاجائے،عدالتی احکامات پر اورنگی نالے ،گجر نالے پر بنی غیر قانونی تعمیرات اور نسلہ ٹاور کو گرادیا، جب الٰہٰ دین پارک کو گرادیا تویہ غیرقانونی قبضے کیوں نظر نہیں آتے مجھ پر شعلہ بیانی کا الزام لگانے والے سن لیں اس شہر اور اس کے مکینوں کو ان کا حق دلوانے کے لئے لڑتا رہوں گا، پیپلزپارٹی کاعوام کے ساتھ گہرا رشتہ برقرار رہے گا،میرے لئے لازم ہے جو محنت کرے اسے بلا تفریق رنگ و نسل سلام پیش کروں،ہمارا صرف ایک پوائنٹ ایجنڈا ہے کہ عوام کی خدمت کرنی ہے، لانڈھی میڈیکل کمپلیکس میں قائم مردہ خانہ کو فعال کرکے 58 میتوں کو غسل دینے اور رکھنے کی مفت سہولت فراہم کی گئی ہے، یہاں ائرکنڈیشننگ نظام کو بھی درست کیاگیا ہے،جنوری کے آخر تک اس مردہ خانے کو سولر سسٹم پر منتقل کر دیا جائے گا تاکہ بجلی کی بچت کے ساتھ کارکردگی مزید بہتر ہو سکے، یہ بات انہوں نے منگل کے روز لانڈھی میڈیکل کمپلیکس میں قائم مردہ خانہ کا افتتاح کرنے کے بعد میڈیا کے نمائندوں سے گفتگو کرتے ہوئے کہی، اس موقع پر ڈپٹی میئر کراچی سلمان عبداللہ مراد ،پارلیمانی لیڈر سٹی کونسل کرم اللہ وقاصی، ڈپٹی پارلیمانی لیڈر دل محمد، جمن دروان، سینئرڈائریکٹر میڈیکل اینڈ ہیلتھ سروسز عمران صمدانی، میڈیکل سپرنٹنڈنٹ لانڈھی میڈیکل کمپلیکس ڈاکٹر بابر خان، فوکل پرسن برائے میئر کراچی ڈاکٹر مہوش مٹھانی اور دیگر بھی موجود تھے، میئر کراچی بیرسٹر مرتضیٰ وہاب نے کہاکہ کروڑوں روپے خرچ کرنے کے باوجود لانڈھی میڈیکل کمپلیکس میں مردہ خانہ موجود تو تھا لیکن غیرفعال تھا، تختیاں موجود تھیں لیکن کام نہیں ہورہا تھاجس کے باعث علاقے کے عوام کو شدید مشکلات کا سامنا تھا ، خواتین اراکین نے ہمارے سامنے یہ مسئلہ رکھا کہ اللہ کو کوئی پیارا ہوجائے تو غسل اور میت کو رکھنے کے لئے علاقے میں کوئی جگہ موجودنہیں،آج ہم یہاں پر حاضر ہوئے ہیں تاکہ لوگوں کی خدمت ہوسکے اوروسائل کو لوگوں کے بہترین مفاد میں استعمال کرسکیں ،سب کچھ وہی ہے مگرقیادت تبدیل ہونے سے یہ فرق آیا ہے ،میں نے یہ محسوس کیا کہ بہت سے دیگر علاقوں میں بھی مردہ خانہ کی سہولت موجود نہیں لہٰذاعباسی شہید اسپتال میں اس سہولت کو سب سے پہلے فعال کیا،خوشی ہوتی ہے کہ پرانے بجٹ میں اس سہولت کو فعال کیا ، غریب آدمی کو سہولت دینے کے لئے یہ کام کیا گیا ہے ،جنوری کے آخر میں اسے سولر پر منتقل کردیں گے ، انہوں نے کہاکہ اس اسپتال میں یومیہ دو سو مریضوں کی او پی ڈی ہورہی ہے،سولر پینل کے ساتھ امراض قلب کے علاج کا وارڈ اور خالی جگہ پر نشے کے عادی افراد کے علاج کے لئے بحالی مرکزبنائیںگے،یہ بے مثال شہر ہے،تنقید کرنے والے ہمیں نیچا دکھانے کے لئے شہر کونیچانہ دکھائیں، یہاں بڑے افسران زمین پر قابض ہیں، اس طرح یہ شہر نہیں چل سکتا ، میئر کراچی نے کہاکہ میری بات لوگوں کو بری لگتی ہے کہ شعلہ بیانی کرتے ہیں ، کیا میں یہ زمینیں اپنے لئے مانگ رہا ہوں کتوں کے خلاف کاروائی کریں تو گالیاں پڑتی ہیں،نہ کریں توبھی گالیاں پڑتی ہیں ،بڑے بڑے اداروں نے شہر کی فٹ پاتھوں پرقبضہ کررکھاہے،سرکاری اداروں کو جان بوجھ کر خراب کیا جاتا ہے ،پبلک پرائیوٹ شراکت کے تحت کام کرنا چاہتا ہوں ، ہمیں اب تصاویر سے آگے نکل کرکام کرنا ہوگا ، انہوں نے کہاکہ اورنگی نالہ، گجر نالہ اور دیگر جگہوں پر عدالتی احکامات کے تحت غیر قانونی تعمیرات کے خلاف کارروائیاں کی جا چکی ہیں،مزید غیر قانونی قبضے بھی ختم کرائے جائیں گے، انہوں نے کہاکہ گورنر سے احترام کا رشتہ ہے ، سیاسی اختلافات سے بالاتر ہو کر عوام کی خدمت پر یقین رکھتے ہیں، عوامی سہولیات کی بحالی اور بہتری کے لیے پبلک پرائیویٹ پارٹنرشپ کا ماڈل اپنایا جا رہا ہے تاکہ سرکاری اداروں کی کارکردگی کو مزید بہتر بنایا جا سکے، چائلڈ لیبر معاشرتی مسئلہ ہے اور اسے ختم کرنا ہم سب کی ذمہ داری ہے، انہوں نے کہا کہ جیسے اپنے بچوں کی فکر کرتے ہیں، ویسے ہی دیگر بچوں کا بھی خیال رکھنا ہوگا، عوامی خدمت حکومت کی اولین ترجیح ہے، نظام کوبہتر کرنے کے لئے میں سب کے ساتھ ہوں، انہوں نے کہاکہ چائلڈ لیبر لوگوں کے گھروں میں بھی دکھائی دیتی ہے، جیسے اپنے بچے ہیں ویسے ہی ہم دیگر بچوں کا بھی خیال رکھنا چاہتے ہیں، میئر کراچی نے کہاکہ گورنر سندھ سے احترام کا رشتہ ہے، گورنر رہیں گے تب بھی عزت کروں گا نہیں رہیں گے تب بھی عزت کروں گا، خالد مقبول صاحب کیوں یہ بات کررہے ہیں، فیصل واوڈا کیوں پریس کانفرنس کررہے ہیں، نہال ہاشمی کیوں سرگرم ہوگئے ہیں، یہ وہی بتاسکتے ہیں۔