محکمہ موسمیات کی فیصل آباد سمیت بعض دیگر شہروں میں صبح کے اوقات میں ہلکی دھند کی پیشگوئی

بدھ 18 دسمبر 2024 15:05

فیصل آباد (اُردو پوائنٹ اخبارتازہ ترین - اے پی پی۔ 18 دسمبر2024ء) محکمہ موسمیات نے ۰کل) جمعرات کو صبح کے اوقات میں فیصل آباد سمیت بعض دیگر شہروں میں ہلکی دھند کی پیشگوئی کی ہے اور کہا ہے کہ فیصل آباد،سیالکوٹ، ناروال، گوجرنوالہ، جہلم، لاہور، ساہیوال، اوکاڑہ، ملتان،بہاولپور، رحیم یار خان، بہاولنگراور گردونواح میں بعض مقامات پرصبح کے اوقات میں ہلکی سے درمیانی دُھند و ہلکی سموگ چھائے رہنے کی توقع ہے۔

محکمہ موسمیات کے ترجمان کے مطابق پنجاب کے بیشتر اضلاع میں اگلے 24 گھنٹوں کے دوران موسم سرد اورخشک ،مری، گلیات اور گردو نواح میں موسم شدید سرد اور مطلع جزوی ابرآلود رہنے جبکہ اسلام آباد اور گردونواح میں بھی موسم سرد اور مطلع جزوی ابر آلود رہنے کا امکان ہے۔

(جاری ہے)

انہوں نے بتایا کہ سندھ کے بیشتر اضلاع میں بھی موسم سرد اورخشک رہنے کا امکان ہے جبکہ صبح کے اوقات میں سکھر، شکارپور، کشمور، خیر پوراور گردونواح میں ہلکی دھند چھائے رہنے کی بھی توقع ہے۔

علاوہ ازیں بلوچستان کے بیشتر اضلاع میں موسم سرد اورخشک جبکہ پہاڑی علاقوں میں موسم شدید سردرہے گا تاہم میدانی اضلاع میں جھکڑوتیز ہوا ئیں چلنے کا امکان ہے۔انہوں نے بتایا کہخیبر پختونخواہ کے بیشتر اضلاع میں موسم سرد اورخشک جبکہ پہاڑی علاقوں میں شدید سرد اور مطلع جزوی ابر آلود رہنے کا امکان ہے تاہم چترال، دیر،سوات اور کرم میں ہلکی بارش اور پہاڑوں پر ہلکی برفباری ہو سکتی ہے۔