Live Updates

ماضی میں کبھی آئی ایم ایف کے وفد نے چیف جسٹس سے بریفنگ نہیں لی، شاہ محمود قریشی

آئی ایم ایف کی بریفنگ سے ملک میں قانون کی عملداری کا اندازہ لگایا جا سکتا ہے ، تمام بڑی جماعتیں ہمارے موقف کی تائید کررہی ہیں بہت جلد گرینڈ الائنس بننے جا رہا ہے، رہنماء پی ٹی آئی کی میڈیا سے گفتگو

فیصل علوی بدھ 12 فروری 2025 12:41

ماضی میں کبھی آئی ایم ایف کے وفد نے چیف جسٹس سے بریفنگ نہیں لی، شاہ محمود ..

لاہور(اردوپوائنٹ اخبار تازہ ترین۔12 فروری 2025)پاکستان تحریک انصاف کے رہنماء اور سابق وزیر خارجہ شاہ محمودقریشی کا کہنا ہے کہ ماضی میں کبھی آئی ایم ایف کے وفد نے چیف جسٹس سے بریفنگ نہیں لی ، آئی ایم ایف کی بریفنگ سے ملک میں قانون کی عملداری کا اندازہ لگایا جا سکتا ہے،میڈیا سے گفتگو کرتے ہوئے رہنماءپی ٹی آئی نے کہا کہ تمام بڑی جماعتیں ہمارے موقف کی تائید کررہی ہیں بہت جلد گرینڈ الائنس بننے جا رہا ہے۔

مفتاح اسماعیل، محمود خان اچکزئی اور مولانا فضل الرحمن بھی ہمارے موقف کے ساتھ کھڑے ہیں۔شاہد خاقان عباسی اپنی حکومت سے لاتعلق ہوگئے ہیں اور ہمارے ساتھ کھڑے ہوئے۔انہوں نے کہا کہ حالات بدل گئے ہیں لیکن حکومت ہٹ دھرمی پر اتری ہوئی ہے۔ سب رکاوٹوں اور دفعہ 144لگانے کے باجود بھی صوابی میں پی ٹی آئی کا جلسہ کامیاب ہوا۔

(جاری ہے)

ملتان میں میری بیٹی نے ریلی نکالی جس پراسے گرفتار کرلیا گیا۔

ملتان میں جو ہوا اس امتیازی سلوک کو لوگ دیکھ رہے ہیں۔حکومت اوچھے ہتکھنڈے کرر ہی ہے ۔وزیر اطلاعات عطاءاللہ تاڑر کا جلسہ ہوااس پر کسی نے پابندی نہیں لگائی۔ساری پابندیاں صرف تحریک انصاف کیلئے ہیں ۔ایک سوال کے جواب میں رہنماءپی ٹی آئی کا کہنا تھا کہ بانی پی ٹی آئی عمران خان نے اپنے خط میں اپنی رائے اور تجاویز مثبت سوچ کے ساتھ دی ہیں۔

6 نکات پر بات کی ہے جسے دنیا میں پذیرائی ملی۔ بانی پی ٹی آئی کے خط کا مقصد سیاست دان کا موقف عوام تک پہنچانا تھا۔ وہاں سے جواب نہیں ملا۔ پی ٹی آئی کو کسی ڈیل کی ضرورت نہیں۔26 ویں ترمیم کی درخواستوں کا انتظار کرلیا جاتا تو زیادہ بہتر ہوتا اب بلاوجہ ایشو بن گیا۔ ہائی کورٹ کی سینارٹی لسٹ کو بھی متاثر کیا گیا۔گفتگو کے دوران سابق وزیر خارجہ شاہ محمود قریشی کا مزید کہنا تھا کہ وزیراعظم شہباز شریف اور حمزہ شہباز تمام مقدمات سے بری ہو جائیں گے۔ حلفا کہتا ہوں کہ میں 9 مئی کے کیسز میں بے قصور ہوں۔ دو جج صاحبان نے کہہ دیا کہ پہلے فیصلہ ہونے دیں۔ قانون ہے عدالتیں ہیں ہم ان کا سامنا کریں گے۔ ہم بے قصور ہیں انشاللہء سرخرو ہوں گے۔