Live Updates

’پوری خیبرپختونخواہ حکومت بیچ دی‘ فواد چوہدری کے پی ٹی آئی رہنماؤں پر سنگین الزامات

سلمان اکرم راجہ، شیخ وقاص اور رؤف حسن جعلی اکاؤنٹس چلوا رہے ہیں جنہوں نے عمران خان اور پارٹی کو شدید نقصان پہنچایا، آخر انقلاب مفت تو نہیں آتا؟ سابق وفاقی وزیر کا بیان

ساجد علی پیر 17 فروری 2025 12:58

’پوری خیبرپختونخواہ حکومت بیچ دی‘ فواد چوہدری کے پی ٹی آئی رہنماؤں ..

لاہور ( اُردو پوائنٹ اخبارتازہ ترین۔ 17 فروری 2025ء ) سابق وفاقی وزیر اور سینئر سیاست دان فواد چوہدری نے پی ٹی آئی رہنماؤں پر سنگین الزامات عائد کردیئے۔ اس حوالے سے اپنے ایک بیان میں انہوں نے کہا کہ تحریک انصاف کے رہنما شیخ وقاص اکرم نے پوری خیبر پختونخواہ حکومت بیچ دی، عمران خان کو بتایا گیا ملائیشیا میں اربوں روپے کی پیمنٹ کی، مصدق عباسی معاملے کی تحقیقات کر رہے ہیں، اس کے علاوہ سلمان اکرم راجہ، شیخ وقاص اور رؤف حسن جعلی اکاؤنٹس چلوا رہے ہیں جنہوں نے عمران خان اور پارٹی کو شدید نقصان پہنچایا۔

فواد چوہدری کا کہنا ہے کہ شیخ وقاص اکرم نے افغان مجاہدین کو اسلحہ سپلائی کرنے کے دھندے سے کیریئر کا آغاز کیا، پرویز مشرف، پرویزالٰہی، فریال تالپور، حمزہ شہباز سے پیسے بٹورے، شیخ وقاص اکرم اب تحریک انصاف کی فنڈنگ، صوبائی بجٹ پر عیش کر رہے ہیں، ایک اور فراڈ کا اندازہ لگائیں کہ پی ٹی آئی میں سیکریٹری جنرل منتخب عہدہ ہے لیکن سلمان راجہ خود کو سیکریٹری جنرل کہہ کر فنڈ لے رہے ہیں۔

(جاری ہے)

سابق وفاقی وزیر نے الزام عائد کیا کہ سلمان اکرم نے نواز شریف سے کروڑوں روپے فیس لی، سلمان اکرم راجہ پانامہ سے لےکر حدیبیہ تک ہر گندے کام میں معاون اور پارٹنر رہے، پولیٹیکل کمیٹی کے تیسرے رکن رؤف حسن ہیں، جو ساری عمر تنخواہ دار ایجنٹ رہے ہیں، رؤف حسن نے 5 کروڑ سے زائد رقم پی ٹی آئی سے تنخواہ کے طور پر وصول کرلی، آخر انقلاب مفت تو نہیں آتا؟۔

انہوں نے کہا کہ تحریک انصاف کی سیاسی کمیٹی میں اکثریت ایسے لوگوں کی ہے جو ایک دن کیلئے جیل نہیں گئے، اب اس سیاسی کمیٹی کو ایک غیر اہم کلرک پر قراردادیں یاد آ گئیں ہیں؟ سیاسی کمیٹی کے لوگ کروڑوں روپے کی فنڈنگ کھا گئے اور بانی پی ٹی آئی اور کارکنوں کے نام پر ملنے والی رقوم کا حساب نہیں دے رہے، جو کروڑوں روپے کے فنڈ کھا گئے اور فنڈنگ کا حساب دینے سے انکاری ہیں، جن کی اوقات دو ٹکے کی نہیں ان سے فنڈ نگ کا حساب لینا انتہائی اہم ہے۔