الحمد للہ، شہباز شریف کی قیادت میں ملک ترقی راہ پر چل نکلا ہے، حمزہ شہباز

ملک میں مکمل امن قائم نہ ہونے تک ترقی کا خواب شرمندہ تعبیر نہیں ہوگا،ہم عوامی نمائندے ،خدمت کرنے آئے ہیں، ہمیں تیزی سے آگے بڑھنا ،منزل حاصل کرنا ہے،پارٹی کارکن کی وفات پر اہل خانہ سے تعزیت کے بعد میڈیا سے گفتگو

ہفتہ 15 مارچ 2025 20:35

اسلام آباد (اُردو پوائنٹ اخبارتازہ ترین - این این آئی۔ 15 مارچ2025ء)سابق وزیراعلی پنجاب حمزہ شہباز نے کہا ہے کہ الحمد للہ وزیراعظم شہباز شریف کی قیادت میں ملک ترقی کی راہ پر چل نکلا ہے۔شملہ پہاڑی علاقے میں پارٹی کارکن گڈو شاہ کی وفات پر اہلخانہ سے تعزیت اور کارکنوں سے گفتگو کرتے ہوئے حمزہ شہباز نے کہا کہ گڈو شاہ محنتی اور ایماندار کارکن تھے، انہوں نے پارٹی کیلئے بہت خدمات انجام دیں۔

انہوںنے کہا کہ الحمد للہ، وزیراعظم شہباز شریف کی قیادت میں ملک ترقی کی راہ پر چل نکلا ہے۔انہوں نے کہا کہ دہشت گردی کے مکمل خاتمے کیلئے پوری قوم افواج پاکستان کے شانہ بشانہ کھڑی ہے، دہشت گردی واقعات کی شدید مذمت کرتا ہوں۔ انہوں نے کہا کہ جب تک ملک میں مکمل طور پر امن قائم نہیں ہوگا ترقی کا خواب شرمندہ تعبیر نہیں ہوگا۔

(جاری ہے)

انہوں نے کہا کہ رواں ماہ ترسیلات زر 13.1ارب ڈالر تک پہنچ گئے ہیں، جو خوش آئند بات ہے، اسی تیزی سے ہمیں اپنی برآمدات کو بڑھانا ہے۔

انہوں نے کہا کہ معاشی شعبہ سے منسلک اداروں کی کارکردگی اور معاملات تسلی بخش ہیں، شہباز شریف کی قیادت میں مہنگائی اور پالیسی ریٹ میں کمی جیسے اقدامات عوام کے سامنے ہیں۔ انہوں نے کہا کہ ہم عوام کے نمائندے ہیں اور ان کی خدمت کرنے آئے ہیں، ہمیں تیزی سے آگے بڑھنا ہے اور منزل کو حاصل کرنا ہے۔