دہشتگردی کے واقعات میں اضافہ؛ حکومت کا پارلیمانی قومی سلامتی کمیٹی کا اجلاس بلانے کا فیصلہ

وزیراعظم شہباز شریف کی جانب سے پارلیمانی قومی سلامتی کمیٹی کا بند کمرہ اجلاس بلانے کیلئے مشاورت شروع کردی گئی

ساجد علی اتوار 16 مارچ 2025 19:10

دہشتگردی کے واقعات میں اضافہ؛ حکومت کا پارلیمانی قومی سلامتی کمیٹی ..

اسلام آباد (اُردو پوائنٹ اخبارتازہ ترین۔ 16 مارچ2025ء) حکومت نے ملک میں بڑھتی ہوئی دہشت گردی کے پیش نظر پارلیمانی قومی سلامتی کمیٹی کا اجلاس بلانے کا فیصلہ کرلیا۔ میڈیا رپورٹس کے مطابق وزیراعظم شہباز شریف نے پارلیمانی قومی سلامتی کمیٹی کا اجلاس بلانے کیلئے مشاورت شروع کر دی ہے، اس حوالے سے ذرائع کا کہنا ہے کہ پارلیمنٹ کی قومی سلامتی کمیٹی کا بند کمرہ اجلاس 19 یا 20 مارچ کو متوقع ہے، اجلاس سپیکر قومی اسمبلی سردار ایاز صادق کی زیر صدارت ہوگا، اجلاس میں وزیراعظم شہبازشریف بھی شرکت کریں گے۔

ذرائع نے بتایا کہ اجلاس میں اعلیٰ عسکری قیادت اور انٹیلی جنس اداروں کے سربراہ بھی شریک ہوں گے، پورے ہاؤس کو سلامتی کمیٹی میں تبدیل کیا جائے گا، وفاقی وزراء سمیت تمام پارلیمانی جماعتوں کے لیڈرز کو دعوت دی جائے گی، اعلیٰ عسکری قیادت خیبرپختونخواہ اور بلوچستان میں دہشت گردی کی بڑھتی وجوہات پر بریفنگ دے گی، اراکین کے سوالات کے جواب بھی دیئے جائیں گے، پارلیمانی کمیٹی میں آئندہ کی حکمت عملی بھی منظور کی جائے گی۔

(جاری ہے)

ذرائع سے معلوم ہوا ہے کہ چیئرمین پیپلزپارٹی بلاول بھٹو زرداری کی نیشنل ایکشن پلان ٹو کی تجویز کا بھی جائزہ لیا جائے گا، پارلیمنٹ کے فیصلے کی روشنی میں دہشت گردوں کے خلاف آپریشنز میں تیزی لانے سے متعلق فیصلے ہوں گے، قومی ایکشن پلان پر عمل درآمد کا بھی جائزہ لیا جائے گا۔