Live Updates

پولیس، کسٹم، کوسٹ گارڈ، مسلح افواج، انٹیلیجنس ایجنسیاں یہ سب ریاست کے اوزار ہیں ریاست نہیں

ریاست ہم ہیں جو یہاں بیٹھے ہیں، ججز یا تو اپنے احکامات پر عمل کروائیں ورنہ پھر سپریم کورٹ اور ہائیکورٹ کے ججز مستعفی ہو جائیں، عمر ایوب خان کا ردعمل

محمد علی منگل 8 اپریل 2025 23:36

پولیس، کسٹم، کوسٹ گارڈ، مسلح افواج، انٹیلیجنس ایجنسیاں یہ سب ریاست ..

اسلام آباد (اُردو پوائنٹ اخبارتازہ ترین۔ 08 اپریل2025ء) عمر ایوب خان نے کہا ہے کہ ججز یا تو اپنے احکامات پر عمل کروائیں ورنہ پھر سپریم کورٹ اور ہائیکورٹ کے ججز مستعفی ہو جائیں۔ تفصیلات کے مطابق منگل کے روز عمران خان سے ان کی بہنوں کی ملاقات نہ کروائے جانے کے بعد میڈیا سے گفتگو کرتے ہوئے قومی اسمبلی میں اپوزیشن لیڈر اور رہنما پی ٹی آئی عمر ایوب نے کہا بانی پی ٹی آئی عمران خان اپنے موقف سے پیچھے نہیں ہٹے۔

بانی پی ٹی آئی، بشریٰ بی بی، شاہ محمود قریشی سمیت تمام رہنما سیاسی قیدی ہیں، قیادت پر اور ورکرز پر جو مقدمات بن رہے ہیں ان سے پی ٹی آئی مزید مضبوط ہو رہی ہے۔ انہوں نے کہا کہ یہاں تو عدالتی احکامات نہیں مانے جا رہے، بانی پی ٹی آئی سے میری ملاقات 3 ماہ پہلے ہوئی تھی۔

(جاری ہے)

ہمارے دی گئی لسٹ میں موجود لوگوں سے خان صاحب کی ملاقات نہیں کروائی گئی، یہ انہیں تنہا کرنا چاہتے ہیں تاکہ ان کی آواز عوام تک نہ پہنچے۔

سابق گورنر میاں اظہر کے سر پر پتھر اس وقت مارا گیا جب ہم پرامن کھڑے تھے، پولیس حملہ آور ہوئی اور پرامن لوگوں پر لاٹھی چارج کیا۔ ججز یا تو اپنے احکامات پر عمل کروائیں ورنہ پھر سپریم کورٹ اور ہائیکورٹ کے ججز مستعفی ہو جائیں۔ انہوں نے مزید کہا کہ ریاست کی تعریف کئی دفعہ بتا چکا ہوں، پولیس، کسٹم، کوسٹ گارڈ، مسلح افواج، انٹیلیجنس ایجنسیاں یہ سب ریاست کے اوزار ہیں ، ریاست نہیں ہیں، ریاست ہم ہیں جو یہاں بیٹھے ہیں۔

دوسری جانب فہرست میں نام نہ ہونے کے باوجود عمران خان سے ملاقات کرنے والے پی ٹی آئی رہنماوں پر سلمان اکرم راجہ نے سوال اٹھا دیا۔ سلمان اکرم راجہ کا کہنا ہے کہ مجھے اڈیالہ جیل سے چند میل دور پولیس ناکے پر روک دیا گیا۔ میں آج عدالتی حکم کے تحت وکلا کی عمران خان صاحب سے ملاقات کیلئے پہنچا۔ بیرسٹر گوہر کو آگے جانے کی اجازت دی گئی، میں منتظر رہا۔

میری گاڑی کے آگے مسلح نرغہ تھا، پیدل چلنے پر مجھے سپاہیوں کی نفری نے روک لیا۔ انہوں نے مزید کہا کہ عمران خان صاحب کی بہنوں نورین بی بی اور عظمی بی بی نے علیمہ آپا کے بغیر خان صاحب سے ملاقات سے انکار کر کے ثابت کیا کہ وہ مقتدرہ کی خواہشات کے تابع نہیں۔ کاش پارٹی کے ذمہداران بھی ایسا کردار رکھتے۔ آج لسٹ میں نام نہ ہونے کے باوجود خان صاحب سے ملنے والوں نے اطاعت گزاری کی۔ افسوس۔