بھارت کشمیر ی عوام کا حق خودارادیت کے لئے جدو جہد کا جذبہ نہیں مٹا سکا،انجینئر امیر مقام

بدھ 9 اپریل 2025 23:05

اسلام آباد (اُردو پوائنٹ اخبارتازہ ترین - این این آئی۔ 09 اپریل2025ء)وفاقی وزیر برائے امور کشمیر، گلگت بلتستان و سیفران انجینئر امیر مقام نے کہا ہے کہ بھارت اپنے غیر قانونی زیر تسلط جمو ں و کشمیر کے عوام کا حق خودارادیت کے حصول کی جدو جہد کا جذبہ مٹا نہیں سکا،جب تک ایک پاکستانی بھی زندہ ہے مسئلہ کشمیر زندہ رہے گا۔وہ بدھ کو یہاں کشمیر کانفرنس سے خطاب کر رہے تھے۔

اس موقع پر مسلم لیگ ن کے رہنما راجہ ظفر الحق ،وزیر اعظم آزاد کشمیر چوہدری انوارالحق، سپیکر آزاد کشمیر اسمبلی لطیف اکبر،اے پی ایچ سی کے چیئرمین غلام محمد صفی،رکن قومی اسمبلی حفیظ الدین،مشاہد حسین سید،آزاد کشمیر کے سیاسی رہنما اور اے پی ایچ سی کے قائدین بھی موجود تھے۔کانفرنس سے خطاب کرتے ہوئے وفاقی وزیر نے کہا کہ مقبوضہ کشمیر میں شہادتیں ہوئی ہیں اور خواتین بیوہ ہوئیں،اب بھی ہزاروں کی تعداد میں کشمیری بھارتی جیلوں میں قید ہیں،حریت قیادت بھی جیلوں میں ہے وہیں کئی رہنمائوں کا انتقال ہوا۔

(جاری ہے)

امیر مقام نے کہا کہ بھارت کشمیر ی عوام کا حق خودارادیت کے حصول کی جدو جہد کا جذبہ مٹا نہیں سکا،آج بھی کشمیر ی بھرپور انداز سے اور پہلے سے زیادہ جدوجہد کررہے ہیں۔انہوں نے کہا کہ مقبوضہ کشمیر کے عوام کے ساتھ تھے ساتھ ہیں اور ساتھ رہیں گے،جب تک ایک پاکستانی بھی زندہ ہے مسئلہ کشمیر زندہ رہے گا۔امیر مقام نے کہا کہ وزیر اعظم شہباز شریف نے مسئلہ کشمیر پر اقوام متحدہ میں دلیری سے بات کی۔