چوہدری ارشد جاوید وڑائچ مرحوم جیسے مخلص دوست زندگی کا سرمایہ ہوتے ہیں، خواجہ محمد آصف

سیالکوٹ (اُردو پوائنٹ اخبارتازہ ترین - اے پی پی۔ 09 اپریل2025ء) وزیر دفاع خواجہ محمد آصف نے کہا ہے کہ چوہدری ارشد جاوید وڑائچ (مرحوم) جیسے مخلص دوست زندگی کا سرمایہ ہوتے ہیں، انہوں نے اپنی ساری زندگی غریبوں کی خدمت کے لیے وقف کر رکھی تھی جو یقیناً انکی بخشش و مغفرت کا سبب بنے گی۔ ان خیالات کا اظہار انہوں نے بدھ کو یہاں پاکستان مسلم لیگ( ن) کے رکن صوبائی اسمبلی و پارلیمانی سیکرٹری سوشل ویلفیئر بیت المال پنجاب چوہدری ارشد جاوید وڑائچ (مرحوم) کے ایصال ثواب و بلندی درجات کیلئے ختم قل شریف و اجتماعی دعا کے موقع پر خطاب کرتے ہوئے کیا۔

انہوں نے کہا کہ چوہدری ارشد جاوید وڑائچ (مرحوم ) ایک خدا ترس انسان ہونے کے ساتھ ساتھ بہترین دوست اور منجھے ہوئے سیاستدان تھے جنکی علاقے اور جماعت کے لیے خدمات کو ہمیشہ یاد رکھا جائے گا۔

(جاری ہے)

انہوں نے کہا کہ چوہدری ارشد جاوید وڑائچ (مرحوم) اس دنیائے فانی سے تو کوچ کر گئے ہیں لیکن وہ اپنے عوام اور ہمارے دلوں میں ہمیشہ زندہ رہیں گے۔ وزیر دفاع کا کہنا تھا کہ مرحوم چوہدری ارشد جاوید وڑائچ کے دنیائے فانی سے کوچ کر جانے سے جو خلاء پیدا ہوا ہے وہ کبھی نہیں بھر سکتا۔

انہوں نے کہا کہ ہم سب کو بھی چاہیئے کہ اپنی اخروی زندگی کی تیاری کریں اور نیک اعمال کریں، بالکل اسی طرح غریب و نادار افراد کی مدد کریں جس طرح ہمارے مرحوم بھائی ارشد جاوید وڑائچ کیا کرتے تھے۔ انہوں نے مذید کہا کہ مرحوم چوہدری ارشد جاوید وڑائچ ہر سال رمضان المبارک میں ہزاروں افراد کے لیے سحری و افطاری کا بھی انتظام کرتے تھے اور مجھے اپنے رب تعالیٰ کی بارگاہ سے قوی امید ہے کہ وہ اپنی مخلوق کی خدمت کے بدلے مرحوم کو ضرور بخش دیں گے اور میں دعا گو بھی ہوں کہ میرا رب اپنے حبیب صلی اللہ علیہ وآلہ وسلم کے صدقے مرحوم چوہدری ارشد جاوید وڑائچ کی کامل بخشش و مغفرت فرمائیں اور انکے تمام لواحقین کو صبر جمیل عطا فرمائیں ۔

یاد رہے کہ چوہدری ارشد جاوید وڑائچ (مرحوم) 7 اپریل بروز پیر کو حرکت قلب بند ہو جانے کے باعث دنیائے فانی سے کوچ کر گئے تھے۔ اراکین قومی و صوبائی اسمبلی محمد منشاء اللہ بٹ، چودھری فیصل اکرام، رانا محمد فیاض، رانا شمیم احمد خان، رانا عبدالستار خان، رانا سعید احمد خان، خرم ورک، نوید اشرف، رانا عارف ہرناہ سمیت مختلف مکاتب فکر سے تعلق رکھنے والے افراد نے کثیر تعداد میں ایصال ثواب کی اس تقریب میں شرکت کی اور چوہدری ارشد جاوید وڑائچ مرحوم کی بخشش و مغفرت کے لیے دعائیں کیں۔