وزیراعظم محمد شہباز شریف کی زیر صدارت وزارت انفارمیشن ٹیکنالوجی و ٹیلی کام کے امور پر جائزہ اجلاس

اسلام آباد (اُردو پوائنٹ اخبارتازہ ترین - اے پی پی۔ 16 اپریل2025ء) وزیراعظم محمد شہباز شریف نے ملک میں چھٹی جماعت سے آئی ٹی کے مضمون کو نصاب کا لازمی حصہ قرار دینے کے حوالے سے فی الفور حکمت عملی بنانے کی ہدایت کرتے ہوئے کہا ہے کہ صوبائی حکومتوں کے ساتھ مل کر سکولوں، کالجوں اور یونیورسٹیوں کی سطح پر آئی ٹی کی معیاری اور یکساں تعلیم و تربیت کے حوالے سے کام کیا جائے گا۔

بدھ کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیر صدارت وزارت انفارمیشن ٹیکنالوجی و ٹیلی کام کے امور پر جائزہ اجلاس منعقد ہوا۔وزیراعظم محمد شہباز شریف نے کہا کہ ملک میں آئی ٹی کے شعبے کا فروغ اور آئی ٹی سے متعلق برآمدات میں اضافہ حکومت کی اولین ترجیحات میں شامل ہے۔

(جاری ہے)

وزیراعظم نےملک میں چھٹی جماعت سے آئی ٹی کے مضمون کو نصاب کا لازمی حصہ قرار دینے کے حوالے سے فی الفور حکمت عملی بنانے کی ہدایت کی۔

انہوں نے کہا کہ صوبائی حکومتوں کے ساتھ مل کر سکولوں، کالجوں اور یونیورسٹیوں کی سطح پر آئی ٹی کی معیاری اور یکساں تعلیم و تربیت کے حوالے سے کام کیا جائے گا۔وزیراعظم نے اسلام آباد، گلگت بلتستان ، آزاد جموں و کشمیر اور بلوچستان کے کم ترقی یافتہ علاقوں کے سکولوں ، کالجوں اور ریسرچ اداروں میں آئی ٹی کی تربیت شروع کرنے کی ہدایت کی۔انہوں نے کہا کہ آئی ٹی کے تربیتی پروگرامز کا معیار ایسا ہونا چاہئے جس کی بدولت تربیت حاصل کرنے والے افراد ملک اور بیرون ملک میں اچھی ملازمت حاصل کر سکیں۔

اجلاس کو آئی ٹی کے شعبے میں تربیتی پروگرامز اور دیگر اقدامات کے حوالے سے تفصیلی بریفنگ دی گئی۔بریفنگ کے دوران بتایا گیا کہ سکول براڈ بینڈ کنکٹیویٹی پروجیکٹ کے تحت اسلام آباد کے سکولوں میں انٹرنیٹ کو اپ گریڈ کیا جا رہا ہے ،سال 25۔2024 میں وزارت آئی ٹی و ٹیلی کام نے 49.8 ہزار افراد کو ہائی اینڈ جبکہ 6 لاکھ افراد کو عمومی تربیت فراہم کی ۔

بریفنگ میں یہ بھی بتایا کہ ہواوے کے اشتراک سے بین الاقوامی اسلامک یونیورسٹی ، اسلام آباد ، نیشنل یونیورسٹی آف سائنسز اینڈ ٹیکنالوجی ، اسلام آباد اور کامسیٹس یونیورسٹی ، لاہور کیمپس میں سکلز ووکیشنل ٹریننگ مرکز قائم کئے جا رہے ہیں۔ہواوے کا تربیتی پروگرام جو کہ مصنوعی ذہانت ، کلاؤڈ ، بگ ڈیٹا اور سائبر سکیورٹی سے متعلق ہے، کو غلام اسحاق خان انسٹیٹیوٹ ، ٹوپی، یونیورسٹی آف انجینئرنگ اینڈ ٹیکنالوجی ، ٹیکسلا، مہران یونیورسٹی آف انجینئرنگ اینڈ ٹیکنالوجی ، جام شورو کے نصاب کا حصہ بنایا جا چکا ہے ،وزارت وفاقی تعلیم و فنی تربیت ہواوے کے تعاون سے 146,367 طلباء کو تربیت فراہم کرے گی جبکہ 1300 لیبارٹریوں کو بہتر بنایا جائے گا ، اس اقدام سے اسلام آباد، گلگت بلتستان اور آزاد جموں و کشمیر کے عوام مستفید ہو سکیں گے ۔

اجلاس میں وفاقی وزیر اقتصادی امور احد خان چیمہ ، وفاقی وزیر آئی ٹی و ٹیلی کام شزا فاطمہ، چیئرمین پی ایم یوتھ پروگرام رانا مشہود احمد خان اور متعلقہ اعلیٰ سرکاری افسران نے شرکت کی ۔ ہواوے کے چیف ایگزیکٹو آفیسر ایتھن سن بھی اجلاس میں موجود تھے۔