جے یو آئی ،جماعت اسلامی کے اتحاد سے حکومت کو کوئی خطرہ نہیں‘ ملک احمد خان

صرف ایک جماعت کی جانب سے معمولی نوعیت کے سیاسی بلبلے بنتے ہیں‘ اسپیکر پنجاب اسمبلی

پیر 21 اپریل 2025 19:50

لاہور(اُردو پوائنٹ اخبارتازہ ترین - این این آئی۔ 21 اپریل2025ء)اسپیکر پنجاب اسمبلی ملک محمد احمد خان نے کہا ہے کہ جے یو آئی (ق)اور جماعت اسلامی کے اتحاد سے حکومت کو کوئی خطرہ نہیں، ملکی معیشت ترقی کررہی ہے، صرف ایک جماعت کی جانب سے معمولی نوعیت کے سیاسی بلبلے بنتے ہیں، مولانا فضل الرحمان اور جماعت اسلامی کا اتحاد سیاسی طورپر خوش آئند ہے۔

اپنے بیان میں انہوں نے کہا کہ دونوں جماعتیں ماضی میں بھی متحدہ مجلس عمل کے پلیٹ فارم سے کاوشیں کر چکی ہے، حکومت کا کام کسانوں کو سہولت فراہم کرنا ہے، حکومت جب سپورٹ پرائس کے مسئلے سے باہر نکل رہی ہے تو اسے کسانوں کے دیگر مسائل کو بھی دیکھنا ہوگا۔میرا یہ خیال ہے کہ حکومت اگر سپورٹ پرائس دیتی ہے تو اس کا اثر پیداوار پر کتنا پڑتا ہے، کیا ہمارا کسان بھی ایک ایکٹر میں سے سو من گندم کی پیداوار حاصل کررہا ہے، 1994میں پہلی مرتبہ زرعی ٹیکس کی بات کی گئی۔

(جاری ہے)

محمد احمد خان نے کہا کہ اس وقت پتہ چلا کہ 94فیصد کاشتکاروں کے پاس ساڑھے بارہ ایکٹر رقبہ موجود ہے، اب یہ رقبہ وراثتوں کی تقسیم کے بعد مزید کم ہوگیا ہوگا، سندھ کے پانی کی تقسیم پر اعتراضات کو بلیک میلنگ نہیں سمجھتا، پانی کی تقسیم کے حوالے سے خدشات پر بات ضرور ہونی چاہیے۔انہوںنے کہا کہ دہشتگردی کے خاتمہ کے لئے سپہ سالار نے وہ بات کی جس کے پیچھے پوری قوم کھڑی ہے، کوئی ایک گروہ ہم سے ہمارا ملک اور ہماری طرز معاشرت چھین نہیں سکتا، پاکستانی ایک مضبوط قوم ہے اور دہشتگردی کا ڈٹ کر مقابلہ کریں گے۔