وزیر اعظم محمد شہباز شریف 22 اپریل کو ترکیہ کا دورہ کریں گے، ترجمان دفتر خارجہ

پیر 21 اپریل 2025 21:30

اسلام آباد (اُردو پوائنٹ اخبارتازہ ترین - اے پی پی۔ 21 اپریل2025ء) وزیر اعظم محمد شہباز شریف 22 اپریل کو ترکیہ کے شہر انقرہ کا دورہ کریں گے۔ ترجمان دفتر خارجہ کی جانب سے جاری بیان کے مطابق دورے کے دوران وزیراعظم صدر رجب طیب اردوان کے ساتھ دوطرفہ تعلقات کے ساتھ ساتھ خطے اور اس سے باہر کی حالیہ پیش رفت پر تبادلہ خیال کریں گے۔

(جاری ہے)

بیان میں مزید کہا گیا ہے کہ دیرینہ اتحادیوں اور تزویراتی شراکت داروں کے طور پر پاکستان اور ترکیہ باقاعدہ اعلیٰ سطحی تبادلوں کی روایت کو برقرار رکھتے ہیں جو دونوں ممالک کے درمیان بھائی چارے کے غیرمعمولی رشتوں کی عکاسی کرتے ہیں۔

دونوں ممالک نے باہمی دلچسپی کے مختلف امور پر تعاون اور ہم آہنگی کے لیے اعلیٰ سطحی سٹریٹجک کوآپریشن کونسل کی شکل میں قیادت کی سطح کا طریقہ کار بھی تشکیل دیا ہے۔ اعلیٰ سطحی سٹریٹجک کوآپریشن کونسل کا 7 واں اجلاس اس سال 12 اور 13 فروری کو اسلام آباد میں منعقد ہوا۔ صدر رجب طیب اردوان اور وزیر اعظم محمد شہباز شریف نے 7 ویں اجلاس کی مشترکہ صدارت کی۔ بیان کے مطابق آئندہ ملاقات اس مضبوط مکالمے کے تسلسل کی نمائندگی کرتی ہے اور پاکستان اور ترکیہ کے درمیان کثیر جہتی شراکت داری کو مزید بلند کرنے کے مشترکہ عزم کو اجاگر کرتی ہے۔