امیر مقام سے او آئی سی کے اسسٹنٹ سیکریٹری جنرل و جموں و کشمیر پر خصوصی نمائندے کی ملاقات

اسلام آباد (اُردو پوائنٹ اخبارتازہ ترین - این این آئی۔ 22 اپریل2025ء)وفاقی وزیر امور کشمیر گلگت بلتستان و سیفران انجینئر امیر مقام سے او آئی سی کے اسسٹنٹ سیکریٹری جنرل و جموں و کشمیر پر خصوصی نمائندے ایمبیسڈر یوسف محمد الدوبے نے ملاقات کی۔یہاں جاری بیان کے مطابق وفاقی وزیر برائے آمورِ کشمیر و گلگت بلتستان و سیفران انجینئر امیر مقام نے کہا کہ پاکستان او آئی سی کی مسلسل اور غیر متزلزل حمایت کو قدر کی نگاہ سے دیکھتا ہے جو کہ کشمیر کاز کے لیے او آئی سی کے ایجنڈے کا بنیادی جزو ہے۔

او آئی سی نے بھارت کی جانب سے کشمیری عوام کے انسانی حقوق کی سنگین اور منظم خلاف ورزیوں کی کھل کر مذمت کی ہے اور اقوام متحدہ کے منشور اور متعلقہ سلامتی کونسل کی قراردادوں کے مطابق کشمیریوں کے حقِ خودارادیت کی بھرپور حمایت کی ہے۔

(جاری ہے)

انہوں نے کہا کہ بھارت کے زیر قبضہ جموں و کشمیر کی صورتحال اب بھی گہری تشویش کا باعث ہے۔اب 5 اگست 2019 کو بھارت کے غیر قانونی اور یکطرفہ اقدامات کو پانچ سال سے زائد عرصہ گزر چکا ہے، جن کا مقصد جموں و کشمیر کی عالمی سطح پر تسلیم شدہ متنازعہ حیثیت کو تبدیل کرنا اور وہاں کے آبادیاتی ڈھانچے کو بدلنا تھا۔

انہوں نے کہا کہ بھارتی زیر قبضہ جموں و کشمیر کے عوام نے نام نہاد انتخابات میں مودی پارٹی کو مسترد کر دیا ہے۔وفاقی وزیر انجینئر امیر مقام نے کہا کہ پاکستان اقوام متحدہ کی سلامتی کونسل کی قراردادوں کے مطابق آزاد اور غیرجانبدارانہ رائے شماری کے انعقاد کو یقینی بنانے کے لیے اپنا کردار ادا کرتا رہے گا۔انہوں نے کہا کہ ہم کشمیری عوام کی ناقابلِ تنسیخ حقِ خودارادیت کے حصول تک ان کی اخلاقی، سیاسی اور سفارتی حمایت جاری رکھیں گے۔

اپنے خیالات کا اظہار کرتے ہوئییوسف محمد الدوبے نے کہا کہ ان کا پاکستان کا دورہ جموں و کشمیر کے تنازعے کی بدلتی ہوئی صورتحال، خصوصاً 5 اگست 2019 کے بھارتی اقدامات کے بعد، کو سمجھنے اور جاننے کے لیے ہے۔اس سلسلے میں، آزاد جموں و کشمیر کا دورہ اور وہاں کے عوام اور حکام سے ملاقاتیں انتہائی مفید ثابت ہوئی ہیں۔ دورے کا دوسرا مقصد کشمیری عوام کو یقین دہانی کروانا اور او آئی سی کے کشمیریوں کے جائز موقف کے ساتھ عزم نو کا اظہار کرنا ہے۔

انہوں نے کہا کہ جموں و کشمیر کا تنازعہ اقوامِ متحدہ اور او آئی سی دونوں کے ایجنڈے پر موجود قدیم ترین تنازعات میں سے ایک ہے۔انہوں نے وفاقی وزیر کو آگاہ کیا کہ جموں و کشمیر کی صورتحال پر ایک تفصیلی رپورٹ آئندہ او آئی سی وزرائے خارجہ کے اجلاس میں پیش کی جائے گی۔انہوں نے کہا کہ او آئی سی کے تمام رکن ممالک جموں و کشمیر کے عوام کے حق خودارادیت کی حمایت کرتے ہیں۔