پچھلے 70 سال میں کوئی ایسا لیڈر پیدا نہیں ہوا جس کی شہرت 90 فیصد ہو،عارف علوی

لندن(اردوپوائنٹ اخبار تازہ ترین۔24اپریل 2025)سابق صدر اورپی ٹی آئی رہنماءعارف علوی کا کہنا ہے کہ پچھلے 70 سال میں کوئی ایسا لیڈر پیدا نہیں ہوا جس کی شہرت 90 فیصد ہو،عمران خان واحد لیڈر ہے جس کو پورے ملک کے لوگ پیار کرتے ہیں،ہر کوئی پوچھتا ہے کہ بانی پی ٹی آئی کب رہا ہوں گے،لندن میں تقریب سے خطاب کرتے ہوئے پاکستان تحریک انصاف کے رہنماءنے کہا کہ بانی پی ٹی آئی عمران خان کی مقبولیت کو کم نہیں کیا جا سکتا۔

آپ لوگ جتنا مرضی ظلم کرلیں عمران خان لوگوں کے دلوں میں بستا ہے ۔ انہوں نے کہا کہ بانی پی ٹی آئی عمران خان کو کوئی مائنس نہیں کرسکتا۔ ایون فیلڈ اپارٹمنٹس کہاں سے آئے کسی کو معلوم ہے تو آج تو بتا دے۔ کچھ تو شرم و حیا کریں اور بتا دیں کہ یہ ہیں وہ ذرائع جہاں سے ایون فیلڈ اپارٹمنٹس بنائے گئے ہیں۔

(جاری ہے)

جس دن الیکشن ہوا کسی کو اندازہ نہیں تھا کہ صبح کیا ہو گا۔

لڑکوں نے اپنے بزرگوں کے ہاتھوں پر نقشے بنائے کہ یہ انتخابی نشان ہے اسے بھولنا مت۔رہنماءپی ٹی آئی عارف علوی کا مزید کہنا تھاکہانتخابی نشان چھن جانے پر میں نے بانی پی ٹی آئی سے کہا کہ الیکش ملتوی ہونے چاہئیں لیکن بانی پی ٹی آئی عمران خان نے کہا کہ الیکشن ایک دن کیلئے ملتوی نہیں ہونے چاہئیں ۔یاد رہے کہ اس سے قبل پاکستان تحریک انصاف عارف علوی نے بھی مذاکرات کی حمایت کی تھی ۔

آئندہ انتخابات سے متعلق مذاکرات ہوتے ہیں تو خیرمقدم کریں گے۔بانی پی ٹی آئی عمران خان نے ملک کی خاطر مذاکرات کی حامی بھری تھی۔دورہ امریکہ کے دوران سی این این کو انٹرویو دیتے ہوئے رہنماءپی ٹی آئی نے کہا تھاکہ ہم اس بات کو سراہیں گے کہ آئندہ الیکشنز اور جمہوریت کے قیام کیلئے مذاکرات ہوں۔ ملک میں ہونے والے احتجاج کو طاقت کے زور پر روکا جا رہا تھا۔

انہوں نے کہا تھاکہ پاکستان میں پرنٹ،الیکٹرانک اور سوشل میڈیا اس وقت آزاد نہیں تھے۔ عوام میں مایوسی بڑھ رہی تھی۔گفتگو کے دوران رہنماءپی ٹی آئی عارف علوی کا مزید کہنا تھا کہ بلوچستان کا نوجوان اس وقت مایوس ہے کیوں کہ اس کی آواز نہیں سنی جا رہی تھی۔ بلوچستان کے مسئلے کا حل بھی مذاکرات میں تھا۔ان کا یہ بھی کہنا تھا کہ 8 فروری کے الیکشن میں پی ٹی آئی بلوچستان سے جیتی مگر ہمارے ووٹ کم گنے گئے، ووٹ کم نہ گنے جاتے تو بلوچستان سمیت تمام صوبوں میں ہماری حکومت ہوتی۔

قبل ازیں پی ٹی آئی رہنماءاعظم سواتی کا کہنا تھا کہ بات چیت کے حوالے سے اس ہفتے یا اگلے ہفتے کوئی نہ کوئی پیشرفت ضرور ہوگی۔انہوں نے کہا تھا کہ میں سابق صدر ڈاکٹر عارف علوی کے ملک میںآنے کا انتظار کر رہا تھا۔اسلام آباد میں ڈسٹرکٹ کمپلیکس کے باہر میڈیا سے گفتگو کرتے ہوئے رہنماءپی ٹی آئی نے کہا تھا کہ ہماری کوشش تھی کہ سارے اداروں کو جوڑ سکیں اور نفرتیں ختم کر سکیں۔پاکستان تحریک انصاف کے رہنماءاعظم سواتی کا مزید یہ بھی کہنا تھا کہ بانی پی ٹی آئی عمران خان لوگوں کے دلوں پر راج کرتا ہے اور بچہ بچہ ان سے پیار کرتا تھا۔بانی پی ٹی آئی پاکستان کی سوچ ہے جسے کوئی مائنس نہیں کر سکتاتھا۔ عمران خان نے آنے والی نسلوں کیلئے بات چیت پر رضامندی کا اظہار کیا تھا۔