Live Updates

پہلگام واقعہ بھارتی سکیورٹی اداروں کی اپنی سازش ہے، فیض اللہ فراق

جمعرات 24 اپریل 2025 16:30

گلگت (اُردو پوائنٹ اخبارتازہ ترین - اے پی پی۔ 24 اپریل2025ء) گلگت بلتستان حکومت کے ترجمان فیض اللہ فراق نے کہا ہے کہ پہلگام جیسا غیر انسانی واقعہ بھارتی سکیورٹی اداروں کی اپنی ایک سازش ہےکیونکہ پاکستان انسانی اقدار اور ظرف پر یقین رکھتا ہے ۔ انہوں نے بیان میں کہا کہ اس سوال کا جواب بھارت کو دینا پڑے گا کہ ان کی 7 لاکھ سے زائد فوجیوں کی موجودگی میں یہ افسوس ناک واقعہ کیسے ہوا ؟؟ پاکستان کو خود دہشت گردی کا سامنا ہے اور ہر روز دہشت گردوں کا مقابلہ کر رہا اس کا ذمہ دار کون ہے ؟کیا کلبھوشن یادو سیر و سیاحت کے لئے پاکستان آیا تھا ؟؟ بھارت اس طرح کے واقعات کی آڑ میں کلبھوشن یادو جیسی سازشوں پر پردہ ڈالنا چاہتا ہے ، پاکستانی حدود میں بھارتی خفیہ اداروں کی مداخلت ہر دور میں ثابت ہوتی رہی ہے جس کا جواب بھارت کے پاس نہیں ہے ۔

(جاری ہے)

انہوں نے کہا کہ بھارتی ہندو انتہا پسند حکومت پہلگام واقعے کی تحقیقات کی بجائے روایتی ہٹ دھرمی کا مظاہرہ کرتے ہوئے پاکستان پر الزام عائد کر رہی ہے جو افسوس ناک ہے۔ ترجمان نے واضح کیا کہ پاکستانی قوم بھارت کی کسی بھی قسم کی جارحیت کا جواب دینے کے لئے پاک فوج کے ساتھ منظم انداز میں کھڑی ہے ، خنجراب سے لے کر سیاچن تک اور قراقرم سے لے کر کراچی تک ایک ایک فرد بھارتی جارحیت کا منہ توڑ جواب دینے کے لئے تیار ہے ۔ گلگت بلتستان کے عوام بھارتی ہٹ دھرمی کا مقابلہ کرنے کے لئے اپنی افواج کے ساتھ ہے ۔