پنجاب میں پیپلز پارٹی کو کبھی لیول پلینگ فیلڈ نہیں دیا گیا‘سید حسن مرتضیٰ

سیالکوٹ/لاہور (اُردو پوائنٹ اخبارتازہ ترین - این این آئی۔ 25 اپریل2025ء) پاکستان پیپلز پارٹی وسطی پنجاب کے جنرل سیکرٹری سید حسن مرتضیٰ نے کہا ہے کہ پنجاب میں پیپلز پارٹی کو کبھی لیول پلینگ فیلڈ نہیں دیا گیا اورخاص طور پر لوٹا کریسی اور چھانگا مانگا کی سیاست کو پیپلز پارٹی کے خلاف استعمال کیا گیا،ہمیں حکومت میں ہونے کے باوجود ابھی تک فنڈز نہیں مل رہے۔

وہ پیپلزپارٹی سمبڑیال سٹی کے صدر احسن گھمن کے ڈیرے پر راحیل کامران چیمہ ،چودھری اختر چھوکر،عائشہ نواز چودھری،وزیراعوان کیساتھ پریس کانفرنس سے خطاب کر رہے تھے۔اس موقع پرعنایت علی شاہ ،اعجاز سمہ ،ارشد جٹ،عبدالرزاق سلیمی،ملک طاہر رانا فاروق اشرف،سید علی رضا زیدی،کلیم علی امیر،ودود ڈار،چودھری اعجاز،کاشف گجر،وزیر اعوان،عرفان یاسین،علی زیب زوہیب گوندل،ساجد ڈوگر بھی موجود تھے۔

(جاری ہے)

حسن مرتضیٰ نے کہا کہ پیپلز پارٹی کے امیدواروں نے پی پی 52سے کاغذات نامزدگی جمع کرائے ہیں،پاکستان پیپلز پارٹی پنجاب میں متحرک ہو رہی ہے۔پارٹی امیدوار کا جو فیصلہ کریگی اسکی پابندی کرینگے۔انکا کہنا تھا کہ پیپلز پارٹی ایشوز کی سیاست کرتی ہے۔زراعت،پانی کی تقسیم آئینی ترمیم پر بلاول بھٹو متحرک نظر آتے پیں۔سیاسی جماعتوں کے نظریات کمزور پڑ سکتے ہیں پیپلز پارٹی نہیں۔

انہوں نے کہا کہ آئینی عہدے ہونے کا ہرگز مطلب حکومت نہیں۔اختیار ایگزیکٹو کے پاس ہوتا ہے،پاکستان پیپلز پارٹی ہمیشہ فلسطینیوں اور کشیمریوں کی سفارتکاری کرتی رہی ہے۔ایک سوال کے جواب میں حسن مرتضیٰ نے کہا کہ کہ اسرائیل سے فارن فنڈنگ لینے والے کوآج کوئی نہیں پوچھتا۔ایک سیاسی جماعت نے اسرائیل کو تسلیم کرنے کے لئے بھر پور کردار ادا کیا ہے ۔

پیپلز پارٹی اشاروں کی سیاست کرتی تو گڑھی خدا بخش میں سینکڑوں قبریں نہ ہوتیں۔میں خود فارم 47کا شکار ہوں۔میں 44ہزار ووٹ لیکر ہار گیا ہوں۔انہوں نے کہا کہ پاکستان جارحیت پر یقین نہیں رکھتا۔ہمسایوں سے بہتر تعلقات چاہتے ہیں۔مودی حکومت کبھی پانی کبھی سفارتی دہشت گردی کرتی ہے مگر ساری قوم اپنی افواج پاکستان کی پشت پر کھڑی ہے۔پریس کانفرنس سے راحیل کامران چیمہ اور احسن گھمن نے بھی خطاب کیا بعد ازاں پارٹی رہنمائوں نے سابق ٹکٹ ہولڈر زین گھمن کے گھر جا کر فاتحہ خوانی کی۔