پنجاب حکومت کے جبر اور تشدد کے خلاف ینگ ڈاکٹرز میں شدید غم و غصے کا عالم ہے ، ینگ ڈاکٹرز ایسوسی ایشن بلوچستان

کوئٹہ(اُردو پوائنٹ اخبارتازہ ترین - آن لائن۔ 29 اپریل2025ء)ینگ ڈاکٹرز ایسوسی ایشن بلوچستان کے ترجمان نے کہا ہے کہ گرینڈ ہیلتھ الائنس اور وائی ڈی اے پنجاب پر پنجاب حکومت کی جانب سے تشدد اور مظالم کی شدید الفاظ میں مذمت کرتے ہیں۔ یہ ظالم حکومت اپنی نااہلی چھپانے کے لیے معصوم ڈاکٹرز کو تشدد کا نشانہ بنا رہی ہے۔ ینگ ڈاکٹرز کے پرامن احتجاج کو کچلنے کی کوششیں نہ صرف ناکام ہوں گی بلکہ عوام کی نفرت کو اور بھڑکائیں گی۔

پنجاب حکومت کا یہ رویہ ثابت کرتا ہے کہ وہ عوامی مسائل کے بجائے طاقت کے بل پر حکمرانی چاہتی ہے۔ ڈاکٹرز کے خلاف پولیس کی بربریت، لاٹھی چارج، اور گرفتاریاں حکومتِ پنجاب کے لیے باعث شرم ہیں۔ترجمان نے بیان میں کہا کہ حکومت پنجاب نے ینگ ڈاکٹرز کی قیادت کو انتقامی کارروائیوں کا نشانہ بنا کر اپنی بوکھلاہٹ اور کمزوری کا اعلان کر دیا ہے۔

(جاری ہے)

لیڈرز کو معطل کرنا، گرفتار کرنا، یا دھمکانا دراصل وائی ڈی اے کی عوامی حمایت سے خوفزدہ ہونے کی علامت ہے۔ تاریخ گواہ ہے کہ جب بھی ظالم نے آوازوں کو طاقت سے کچلنے کا راستہ اپنایا ہے تب عوامی انقلاب نے جنم لیا ہے۔ پنجاب حکومت کا یہ اقدام نہ صرف ناکام ہوگا بلکہ ینگ ڈاکٹرز کے عزم کو مزید مضبوط کرے گا۔ یہ حکومت سمجھتی ہے کہ طاقت کے زور پر عوامی تحریکوں کو خاموش کیا جا سکتا ہے، لیکن یہ ان کا وہم ہے جو انہیں تباہی کی طرف لے جائے گاترجمان نے کہا کہ تاریخ کے اوراق گواہ ہیں کہ ینگ ڈاکٹرز نے کبھی بھی طاقت کے سامنے سر نہیں جھکایا۔

ان کا احتجاج انصاف، حقوق اور انسانیت کی آواز ہے جسے کوئی ظالم حکومت دبا نہیں سکتی۔ پنجاب حکومت کی یہ خام خیالی ہے کہ وہ ڈاکٹروں کو ڈرا کر یا مار کر ان کے مطالبات کو دفن کر دے گی۔ ینگ ڈاکٹرز کی قربانیاں، ان کا اتحاد، اور ان کی بے خوفی ہمیشہ ظلم پر غالب آئی ہے۔ آج بھی یہ ڈاکٹرز اپنے ہاتھوں میں سفید کوٹ اور دلوں میں انقلاب لے کر کھڑے ہیں۔

انہیں روکنا کسی کے بس کی بات نہیںترجمان نے کہا کہ پنجاب حکومت کے وزیروں اور مشیر احمقوں کی جنت میں رہتے ہوئے سمجھتے ہیں کہ ینگ ڈاکٹرز کو طاقت کے بل پر خاموش کرا دیا جائے گا، لیکن یہ محض ان کی حماقت ہے۔ جو لوگ ڈاکٹروں کو خاموش کرانے کا خواب دیکھتے ہیں، وہ تاریخ کے کچرے کے ڈھیر پر پڑے ہوئے ہیں۔ ڈاکٹرز کی آواز کوئی کمزور آواز نہیں جو دبایا جا سکے۔

پنجاب حکومت کا یہ گھٹیا رویہ عوام کو مزید مشتعل کر رہا ہے، اور اس کا انجام بربادی ہوگاترجمان نے کہا کہ ینگ ڈاکٹرز نے ہمیشہ اپنے اتحاد، نظم، اور استقامت کی بنیاد پر کامیابیاں سمیٹی ہیں۔ آج بھی وہ اپنے حقوق کے لیے ڈٹے ہوئے ہیں اور کسی بھی قیمت پر پیچھے ہٹنے کو تیار نہیں۔ پنجاب حکومت کی چالوں، جعلی وعدوں، یا جبری کارروائیوں نے ان کے عزم کو کمزور نہیں کیا۔

یہ ڈاکٹرز جانتے ہیں کہ ان کی لڑائی صرف اپنے لیے نہیں، بلکہ پورے نظام صحت اور عوامی حقوق کے لیے ہے۔ ان کا اتحاد پہاڑ کو ہلا سکتا ہے پھر یہ کٹ پتلی حکومت کیا چیز ہے اور یہی وہ طاقت ہے جو حکومت کو خوفزدہ کر رہی ہے ترجمان نے کہا کہ کوئٹہ سے لے کر کشمیر تک، ہر شہر میں ینگ ڈاکٹرز سرکار کی ناکام پالیسیوں کے خلاف برسرپیکار ہیں۔ یہ تحریک اب صرف پنجاب تک محدود نہیں، بلکہ پورے ملک میں پھیل چکی ہے۔

عوام ڈاکٹروں کے ساتھ کھڑے ہیں کیونکہ وہ جانتے ہیں کہ یہ لڑائی ان کی اپنی بقا کی لڑائی ہے۔ حکومت کی جھوٹی ترجیحات، کرپشن، اور عوامی وسائل کی لوٹ نے معاشرے کو تباہ کر دیا ہے۔ ینگ ڈاکٹرز کی یہ جدوجہد دراصل عوامی طاقت کا اظہار ہے جو ظالم حکمرانوں کو للکار رہی ہے۔ ترجمان نے حکومت پنجاب سے مطالبہ کیا کہ ڈاکٹرز اور گرینڈ ہیلتھ الائنس کے مطالبات فورا تسلیم کریں، ورنہ عوامی طاقت تمہاری حکومت بہا لے جائے گی ینگ ڈاکٹرز ایسوسی ایشن بلوچستان گرینڈ ہیلتھ الائنس پنجاب کے ساتھ مکمل یکجہتی کا اعلان کرتے ہوئے پنجاب حکومت کو حتمی انتباہ دیتے ہیں کہ فوری طور پر ینگ ڈاکٹرز کے جائز مطالبات تسلیم کرو، تمام گرفتار ڈاکٹروں کو رہا کرو، اور انتقامی کارروائیوں کو فوری طور پر بند کرو۔

اگر مطالبات پورے نہ ہوئے تو پنجاب کے ساتھ پورے ملک میں سڑکوں پر عوامی طاقت کا طوفان اٹھ کھڑا ہوگا۔ یہ طوفان نہ صرف تمہاری کرپٹ حکومت کو بہا لے جائے گا بلکہ تمہاری تمام ناانصافیوں کا خاتمہ کر دے گا۔