Live Updates

پاکستان علما ء کونسل کا جمعہ کے دن کو یوم استحکام پاکستان کے طورپر منانے کا اعلان

پہلگام کا واقعہ اسرائیلی موساد اور را نے مل کر کیاجس کا ایک مقصد پاکستان پر الزام لگانا ،دوسرا مقبوضہ کشمیر کو غزہ بنانا ہے

بدھ 30 اپریل 2025 20:55

لاہور(اُردو پوائنٹ اخبارتازہ ترین - این این آئی۔ 30 اپریل2025ء)چیئرمین پاکستان علما ء کونسل علامہ طاہر اشرفی نے کہا ہے کہ آئندہ جمعہ یوم استحکام پاکستان کے طورپر منایا جائے گا۔اپنے بیان میں علامہ طاہر اشرفی نے کہا کہ بھارتی دہشتگردی کے ثبوت پاکستان ہی نہیں کینیڈا و امریکہ میں بھی سامنے آچکے ہیں، پہلگام کا واقعہ اسرائیلی موساد اور را نے مل کر کیاجس کا ایک مقصد پاکستان پر الزام لگانا اور دوسرا مقبوضہ کشمیر کو غزہ بنانا ہے۔

انہوں نے کہا کہ اسرائیلی ایجنٹس مقبوضہ کشمیر میں آچکے ہیں، موساد غزہ کی کہانیاں مقبوضہ کشمیر میں دہرانا چاہتی ہے، وزیر اعظم و وزیر خارجہ نے تحقیقات کی پیشکش کی ہے، عالمی تحقیقات صرف پہلگام ہی نہیں جعفر ایکسپریس سمیت دیگر دہشتگردی کی بھی ہونی چاہیے۔

(جاری ہے)

انہوںنے کہا کہ گزشتہ روز ڈی جی آئی ایس پی آر نے پریس کانفرنس میں ثبوت رکھے ہیں، بھارت دیکھ لے آبی نندن کی طرح ہر بار چائے پلا کر واپس نہیں کیا جاتا ،اس بار ڈنڈا استعمال ہوگا، پاک فضائیہ نے گزشتہ رات جس طرح بھارتی سازش کو ناکام بنایا ہے وہ قابل تعریف ہے۔

علامہ طاہر اشرفی نے مزید کہا کہ مدارس کے تیس لاکھ طلبہ پاک فوج کے ساتھ ہیں، چین سعودی عرب سمیت دیگر دوست ممالک کشیدگی کم کرانے کے لئے کوشاں ہیں، بھارت نے جو الزام لگایا ہے اس کے ثبوت دے۔انہوںنے کہا کہ آئندہ جمعہ یوم استحکام پاکستان کے طورپر منائیں گے، چار مئی کو پاکستان علما ء کونسل کی شوری بلائی گئی ہے۔