ڈی ڈبلیو 
اسلام آباد (اُردو پوائنٹ ۔ DW اردو۔ 04 مئی 2025ء) اتوار کے روز یمن کے حوثی باغیوں نے اسرائیل کے مرکزی بین الاقوامی ہوائی اڈے پر میزائل حملے کی ذمہ داری قبول کر لی۔ انہوں نے کہا کہ یہ کارروائی غزہ میں فلسطینیوں کی حمایت میں کی گئی ہے۔
حوثی باغیوں نے اپنے بیان میں کہا، ''یمنی مسلح افواج کی میزائل فورس نے بن گوریون ایئرپورٹ کو ایک فوجی کارروائی کے دوران ہائپر سونک بیلسٹک میزائل سے نشانہ بنایا۔
‘‘اس ایران نواز گروپ نے مزید کہا کہ ''میزائل نے کامیابی کے ساتھ اپنے ہدف کو نشانہ بنایا‘‘ اور یہ حملہ ''مظلوم فلسطینی عوام اور ان کے مجاہدین کی حمایت میں کیا گیا۔‘‘
واضح رہے کہ حوثی باغی یمن کے وسیع تر علاقوں پر کنٹرول رکھتے ہیں اور وہ غزہ کی جنگ کے دوران اسرائیل کو اور بحیرہ احمر میں تجارتی جہازوں کو متعدد میزائل اور ڈرون حملوں کا نشانہ بنا چکے ہیں۔
(جاری ہے)
اگرچہ اسرائیل نے حوثیوں کے زیادہ تر حملے روکے ہیں لیکن اتوار کے روز حکام کا کہنا تھا کہ یمن سے داغا گیا ایک میزائل تل ابیب کے قریب واقع بن گوریون ایئرپورٹ کے علاقے میں آ گرا، جس کے بعد کچھ دیر کے لیے ہوائی ٹریفک معطل کرنا پڑ گئی۔
اسرائیلی پولیس نے ہوائی اڈے کے قریب ''میزائل گرنے‘‘ کی تصدیق کی ہے جبکہ فوج کا کہنا تھا، ''متعدد بار اس میزائل کو روکنے کی کوشش کی گئی تھی۔
‘‘تاحال یہ واضح نہیں ہو سکا کہ دھماکہ یمنی میزائل کی وجہ سے ہوا یا کسی انٹرسیپٹر کی وجہ سے۔
حوثی باغیوں نے خبردار کیا ہے، ''یمنی مسلح افواج تمام بین الاقوامی فضائی کمپنیوں کو خبردار کرتی ہیں کہ بن گوریون ایئرپورٹ کی جانب اپنی پروازیں جاری نہ رکھیں کیونکہ اب یہ فضائی ٹریفک کے لیے غیر محفوظ ہو چکا ہے۔‘‘
اسرائیلی وزیر دفاع کی سخت جوابی کارروائی کی دھمکی
ادھر اسرائیل کے وزیر دفاع اسرائیل کاٹز نے یمن سے داغے گئے ایک اور میزائل کے بعد شدید ردعمل کی دھمکی دی ہے۔
کاٹز نے کہا، ''جو ہمیں نشانہ بنائے گا، ہم اسے سات گنا زیادہ جواب دیں گے۔‘‘ ان کا یہ بیان بظاہر ایک مذہبی حوالہ ہے، جو سخت سزا یا ''خدائی انصاف‘‘ سے متعلق ہے۔
بظاہر اسرائیل کا فضائی دفاعی نظام یمن کے حوثی باغیوں کی جانب سے داغے گئے میزائل کو روکنے میں ناکام ہو گیا۔ اسرائیلی دفاعی افواج کے مطابق یہ میزائل بن گوریون انٹرنیشنل ایئرپورٹ کے نزدیک گرا۔
اسرائیلی ریسکیو سروس کے مطابق اس حملے میں کم ازکم آٹھ افراد زخمی ہوئے۔
ادارت: امتیاز احمد، مقبول ملک
