شہید محمد اشرف خان صحرائی کی بے مثال قربانیاں آنے والی نسلوں کیلئے ہمیشہ مشعل راہ رہیں گی، کل جماعتی حریت کانفرنس

اسلام آباد (اُردو پوائنٹ اخبارتازہ ترین - اے پی پی۔ 05 مئی2025ء) کل جماعتی حریت کانفرنس آزاد کشمیر و پاکستان شاخ کے کنوینر غلام محمد صفی ،جنرل سکرٹری ایڈوکیٹ پرویز احمد ،سکرٹری اطلاعات مشتاق احمد بٹ اور جملہ حریت قیادت نے حریت رہنما شہید محمد اشرف صحرائی کی چوتھی برسی کے موقع پر انہیں اور ان کے خاندان کی تحریک آزادی کشمیر کے لیے دی گئی لازوال قربانیوں کو شاندار الفاظ میں خراج عقیدت پیش کیا ہے۔

یہاں جاری ایک مشترکہ بیان کے مطابق حریت رہنمائوں نے کہا کہ شہید محمد اشرف صحرائی تحریک آزادی کشمیر کے بےباک اعلی سیاسی بصیرت اور جہد مسلسل سے عبارت شخصیت کے مالک تھے جنہوں نے اپنی پوری زندگی تحریک آزادی کشمیر کے لیے وقف کر دی، ان کا ایمان محکم، عزم صمیم اور جدوجہد مسلسل رہی۔

(جاری ہے)

انہوں نے نہ صرف خود مصائب جھیلے بلکہ اپنے نور نظر جنید صحرائی سمیت اپنے خاندان کے کئی افراد کو کلمتہ اللہ اور وطن عزیز کی آزادی کی خاطر خندہ پیشانی سے قربان کیا۔

ایک باپ کے لیے اپنے جوان بیٹے کی قربانی ناقابل برداشت ہوتا ہے لیکن اشرف صحرائی نے اس عظیم قربانی کو بھی صبر و استقامت کے ساتھ برداشت کیا، جو ان کے پختہ ایمان اور اور تحریک آزادی کشمیر کے ساتھ وابستگی کا منہ بولتا ثبوت ہے۔ شہید محمد اشرف خان صحرائی کی یہ بے مثال قربانیاں آنے والی نسلوں کے لیے ہمیشہ مشعل راہ رہیں گی اور انہیں حریت کی تاریخ میں سنہرے حروف سے یاد رکھا جائے گا۔

حریت رہنمائوں نے مزید کہا کہ اشرف صحرائی محض گفتار کے غازی نہیں تھے بلکہ وہ کردار کے بھی غازی تھے۔ ان کی پوری زندگی جدوجہد آزادی کشمیر کے لیے وقف رہی اور انہوں نے اپنے اصولی موقف پر کبھی کوئی سمجھوتہ نہیں کیا۔ باطل قوتوں کے سامنے ان کا سر ہمیشہ بلند رہا اور انہوں نے قید و بند کی صعوبتیں بھی مسکرا کر برداشت کیں۔ انہوں نے کہا کہ تحریک آزادی میں ان کی دی جانے والی قربانیاں ہمارے لیے ایک روشن مثال ہیں جس سے ہم ہمیشہ رہنمائی حاصل کرتے رہیں گے،ان کی فکر، ان کا فلسفہ اور ان کی قربانیاں تحریک آزادی کشمیر کے لیے ایک قیمتی اثاثہ ہیں۔

حریت رہنمائوں نے اپنے عزم کا اعادہ کرتے ہوئے کہا کہ محمد اشرف صحرائی سمیت تمام شہدا کی قربانیوں کو کسی صورت رائیگاں نہیں جانے دیا جائے گا،ہم عہد کرتے ہیں کہ بھارت سے مکمل آزادی تک حق خودارادیت کی جدوجہد ہر صورت جاری رکھیں گے،کشمیری عوام اپنی منزل کے حصول تک اپنی پرامن اور مبنی برحق جدوجہد جاری رکھنے کے لیے پرعزم ہیں، ظلم و جبر کے باوجود کشمیریوں کا حوصلہ پست نہیں ہوا اور وہ اپنے شہدا کے خون کا قرض ضرور چکائیں گے۔

حریت رہنمائوں نے عالمی برادری سے بھی اپیل کی کہ وہ مقبوضہ جموں و کشمیر میں جاری بھارتی ریاستی دہشت گردی اور انسانی حقوق کی سنگین خلاف ورزیوں،بلاجواز گرفتاریوں ،گھروں کی مسماری ، ماورائے عدالت قتل ،چادر اور چار دیواری کی پامالیوں اور ڈیموگرافی تبدیلیوں کا فوری نوٹس لیں اور کشمیری عوام کو ان کا ناقابل تنسیخ حق خودارادیت دلوانے کے لیے اپنا موثر اور عملی کردار ادا کریں تاکہ خطے میں پائیدار امن قائم ہو سکے،خاموشی اختیار کرنا ظالم کی حوصلہ افزائی کے مترادف ہے اور عالمی برادری کو اس صورتحال کا ادراک کرنا چاہیے۔