Live Updates

خیبر پختونخواکے مختلف علاقوں میں سیکیورٹی فورسز کی کارروائیاں ، 8 دہشت گرد جہنم واصل

پیر 5 مئی 2025 23:40

راولپنڈی (اُردو پوائنٹ اخبارتازہ ترین - اے پی پی۔ 05 مئی2025ء) خیبر پختونخواکے مختلف علاقوں میں سیکیورٹی فورسز نے کارروائیاں کرتے ہوئے 8 دہشت گردوں کو جہنم واصل کردیاجبکہ شدید فائرنگ کے تبادلے میں ایک فوجی جوان شہید ہو گیا۔آئی ایس پی آر کے مطابق سیکیورٹی فورسز کی جانب سے شمالی وزیرستان کے ضلع میر علی میں انٹیلی جنس پر مبنی آپریشن کیا گیا۔

آپریشن کے دوران فورسز نے خوارج کے ٹھکانے کو مؤثر نشانہ بنایا، جس کے نتیجے میں تین خوارج مارے گئے۔اسی طرح جنوبی وزیرستان کے ضلع میں کیے گئے ایک اور آپریشن میں سیکیورٹی فورسز نے 2 خارجی دہشتگردوں کو ہلاک کردیا، تاہم شدید فائرنگ کے تبادلے میں 40 سالہ نائیک مجاہد خان (رہائشی ڈسٹرکٹ کوہاٹ) نے بہادری سے لڑتے ہوئے جام شہادت نوش کیا۔

(جاری ہے)

خیبر اور بنوں کے اضلاع میں سیکیورٹی فورسز اور خوارج کے درمیان دو مزید جھڑپیں ہوئیں، جس کے نتیجے میں تین خوارج مارے گئے۔

ہلاک خوارج سے اسلحہ، گولہ بارود اور دھماکا خیز مواد بھی برآمد ہوا، یہ دہشتگرد علاقے میں سیکیورٹی فورسز کے خلاف دہشت گردی کی متعدد کارروائیوں کے ساتھ ساتھ معصوم شہریوں کی ٹارگٹ کلنگ میں بھی ملوث تھے۔علاقے میں موجود کسی اور خارجی کو ختم کرنے کے لیے کلیئرنس آپریشن کیا جا رہا ہے۔آئی ایس پی آر کا کہنا تھا کہ پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔