بھارت بھر میں ایمرجنسی تیاریاں، شہری دفاع کی فرضی مشقوں کا آغاز

فضائی حملے کے خدشے کے پیش نظر عوام کو خبردار کرنا اور اہم تنصیبات کو محفوظ بنانا ہے،رپورٹ

منگل 6 مئی 2025 17:12

نئی دہلی (اُردو پوائنٹ اخبارتازہ ترین - این این آئی۔ 06 مئی2025ء)بھارتی حکومت نے ملک بھر کی تمام ریاستوں کو شہری دفاع کے تحت فرضی مشقیں شروع کرنے کا حکم دیا ہے، جن کا مقصد فضائی حملے کے خدشے کے پیش نظر عوام کو خبردار کرنا اور اہم تنصیبات کو محفوظ بنانا ہے۔غیرملکی خبررساں ادارے کے مطابق یہ فیصلہ وزیر اعظم نریندر مودی کی سیکریٹری دفاع راجیش کمار سنگھ سے ملاقات اور بعد ازاں قومی سلامتی کے مشیر اجیت دووال کی بریفنگ کے بعد سامنے آیا۔

بھارتی میڈیا کے مطابق یہ مشقیں 7 مئی سے 9 مئی تک جاری رہیں گی۔ان مشقوں میں فضائی حملے کی وارننگ سسٹمز، سائرن بجانے، کریش بلیک آٹ، حساس عمارتوں کو اندھیرے میں چھپانے، انخلا کے منصوبے، اور عوام کی رہنمائی جیسے اقدامات شامل ہوں گے۔

(جاری ہے)

سرکاری ذرائع کا کہنا تھا کہ یہ فیصلہ حالیہ پہلگام حملے کے بعد پاکستان اور بھارت کے درمیان کشیدگی کے تناظر میں کیا گیا ۔

وزارت داخلہ کے تحت سول ڈیفنس کے چار لاکھ سے زائد رضاکار ان مشقوں میں حصہ لیں گے۔پنجاب کے سرحدی ضلع فیروزپور میں بھارتی پولیس پہلے ہی 30 منٹ کی بلیک آٹ مشق کر چکی ہے، جس کے دوران مقامی رہائشیوں کو لائٹس بند رکھنے کی ہدایت دی گئی تھی۔عہدیداروں کا کہنا تھا کہ کچھ ریاستیں اس قسم کی مشقوں کے لیے بہتر طور پر تیار ہیں، جبکہ دیگر کو رہنما ہدایات فراہم کی جائیں گی۔