حکومت ملک بھر بالخصوص خیبر پختونخوا کے نوجوانوں کو بااختیار بنانے کے لئے سٹارٹ اپس کی ہر ممکن معاونت کر رہی ہے، فیصل کریم کنڈی

اسلام آباد (اُردو پوائنٹ اخبارتازہ ترین - اے پی پی۔ 07 مئی2025ء) گورنر خیبر پختونخوا فیصل کریم کنڈی نے کہاہے کہ حکومت ملک بھر بالخصوص خیبر پختونخوا کے نوجوانوں کو بااختیار بنانے کے لئے سٹارٹ اپس کی ہر ممکن معاونت کر رہی ہے، ہم انہیں محض کاروباری ادارے نہیں بلکہ معیشت کے انجن، روزگار کے مواقع پیدا کرنے والے اور ٹیکنالوجی کی ترقی کے محرک سمجھتے ہیں۔

گورنر آفس سے جاری بیان کے مطابق ان خیالات کا اظہارانہوں نے بدھ کو نیشنل انکیوبیشن سینٹر (این آئی سی) اسلام آباد کے دورہ کے موقع پر منعقدہ تقریب سے خطاب کرتے ہوئے کیا۔گورنر خیبر پختونخوا کو اس موقع پر نیشنل انکیوبیشن سنٹر کے پراجیکٹ ڈائریکٹر سید احمد مسعود کی جانب سے ادارہ کے اغراض و مقاصد اور مجموعی کارکردگی سے متعلق تفصیلی بریفنگ دی گئی۔

(جاری ہے)

گورنر نے اس موقع پر ادارہ کے مختلف حصوں کا دورہ بھی کیا۔تقریب سے خطاب کرتے ہوئے گورنر خیبر پختونخوا نے نیشنل انکیوبیشن سنٹر اسلام آباد کے کردار کو سراہتے ہوئے کہا کہ یہ مرکز پاکستان میں اختراع، کاروبار اور ڈیجیٹل ترقی کی علامت بن چکا ہے۔این آئی سی اسلام آباد نے پاکستانی ٹیلنٹ کو بین الاقوامی سطح تک رسائی دلانے میں اہم کردار ادا کیا ہے۔

ایسے اقدامات نہ صرف مقامی سٹارٹ اپ ایکو سسٹم کو مضبوط کرتے ہیں بلکہ پاکستان کی عالمی سطح پر ساکھ کو بھی بہتر بناتے ہیں۔گورنر نے کہاکہ خیبرپختونخوا میں ملک بھر سے نوجوانوں کی تعداد زیادہ ہے، بحیثیت گورنر خیبر پختونخوا یوتھ انگیجمنٹ، خواتین کی خودمختاری سے متعلق اقدامات ان کی اولین ترجیحات میں شامل ہے۔انہوں نے نیشنل انکیوبیشن سنٹر کی انتظامیہ کو خیبر پختونخوا دورہ کی دعوت دیتے ہوئے صوبہ کے نوجوانوں کو سٹارٹ اپس مواقع فراہم کرنے کی ضرورت پر زور دیا اور کہا کہ اس ضمن میں گورنر ہاؤس پشاور کی جانب سے مکمل تعاون فراہم کیا جائے گا۔

گورنر نے اپنے خطاب میں بھارتی جارحیت سے متعلق کہا کہ بھارت نے رات کی تاریکی میں بزدلانہ حرکت کی اور پاکستان کے امن کے پیغام کو غلط سمجھا، ملک بھر بالخصوص خیبر پختونخوا کے عوام اپنی مسلح افواج کے ساتھ متحد کھڑے ہیں اور بھارت کو منہ توڑ جواب ابھی بھی دیا ہے اور آئندہ بھی دیتے رہیں۔