ًپنجاب اسمبلی میں بھارتی جارحیت کے خلاف مذمتی قرارداد منظور، حنا پرویز بٹ کا سخت ردعمل

بدھ 7 مئی 2025 20:15

(لاہور (آن لائن) پنجاب اسمبلی نے مسلم لیگ (ن) کی رکن صوبائی اسمبلی حنا پرویز بٹ کی جانب سے پیش کردہ بھارتی جارحیت کے خلاف مذمتی قرارداد متفقہ طور پر منظور کر لی۔ قرارداد میں نہتے شہریوں، خاص طور پر خواتین اور بچوں کو نشانہ بنانے پر شدید تشویش کا اظہار کرتے ہوئے دشمن کو آئندہ ہر قدم پر سخت جواب دینے کے عزم کا اعادہ کیا گیا۔ حنا پرویز بٹ نے اپنے خطاب میں کہا کہ بھارت نے صرف پاکستان کی سرزمین پر حملہ نہیں کیا، بلکہ عورت کی عزت، ماں کی ممتا اور معصوم بچیوں کے تحفظ پر بھی حملہ کیا ہے۔

انہوں نے تین سالہ بچی اور دیگر خواتین کو نشانہ بنانے کے اقدام کو انسانیت کے چہرے سے نقاب نوچنے کے مترادف قرار دیا۔ انہوں نے کہا کہ ہر زخمی بچی اور شہید ماں کے خون کا حساب لیا جائے گا۔

(جاری ہے)

بھارتی حملہ بزدلی اور اخلاقی دیوالیہ پن کی بدترین مثال ہے۔ حنا پرویز بٹ نے انسانی حقوق کی تنظیموں سے مطالبہ کیا کہ وہ بھارتی جنگی جرائم کا نوٹس لیں۔ اس موقع پر انہوں نے اعلان کیا کہ پنجاب ویمن پروٹیکشن اتھارٹی متاثرہ علاقوں میں ہنگامی امدادی مراکز قائم کرے گی تاکہ متاثرہ خواتین اور بچوں کو فوری مدد فراہم کی جا سکے۔ انہوں نے افواجِ پاکستان کو خراجِ تحسین پیش کرتے ہوئے کہا کہ ہمارے محافظ چوکنا ہیں اور قوم جاگ رہی ہے۔ "بھارت نے ہمیں آزمایا ہے، اب ہم تاریخ لکھیں گے۔