ملک کی سالمیت کے لیے ہم اداروں اور سیکورٹی کے فورسز کے ساتھ کھڑے ہیں،ثروت اعجاز قادری

کراچی(اُردو پوائنٹ اخبارتازہ ترین - این این آئی۔ 09 مئی2025ء)پاکستان سنی تحریک کے مرکزی صدر انجینئر محمد ثروت اعجاز قادری اور مرکزی سیکرٹری جنرل علامہ بلال سلیم قادری شامی نے پاکستان سنی تحریک کے رہنما اور عہدے داران کے ہمراہ ایم اے جناح روڈ مزار قائد کے قریب پریس کانفرنس کرتے ہوئے کہا کہ یہ پریس کانفرنس اور احتجاجی مظاہرہ کرنے کا مقصد یہ ہے کہ جو پاکستان کی سالمیت سے کھیلے گا اس کو ہم دنیا کے آخری کونے تک نہیں چھوڑیں گے۔

بھارتی حکومت اور بھارتی ایجنسیوں نے پاکستان کے اندرونی معاملات کو خراب کرنے کے لیے دہشت گردوں کی فنڈنگ کی بھارت کی تمام سازشوں کو پاکستان کے سیکیورٹی اداروں نے ناکام بنا دیا،پھر بھارتی حکومت نے پاکستان کو بدنام کرنے کے لیے طرح طرح کے الزامات لگائے مگر وہ ان الزامات کے کوئی ثبوت پیش نہیں کر پایا۔

(جاری ہے)

اب بھارت کھل کر پاکستان دشمنی پر اتر آیا ہے۔

کبھی ایل او سی پر بلا اشتعال فائرنگ کرتا ہے تو کبھی پاکستانی حدود میں داخل ہونے کی کوشش کرتا ہے ان تمام کوششوں میں ناکامی کے بعد اب بھارت نے پاکستان میں میزائل حملے شروع کر دیے بھارتی میزائل حملے میں 35 سے 40 پاکستانی شہید ہوئے مگر بھارت یہ کرنے کے بعد بھول گیا تھا کہ پاکستان بھی اس کا جواب دینا بخوبی جانتا ہے۔افواج پاکستان نے اپنے ملک و قوم کا دفاع کرتے ہوئے کامیاب حکمت عملی اپناتے کے ساتھ منٹوں میں بھارتی لڑاکا طیارے مار گرائے۔

افواج پاکستان کی جانب سے بھارتی چیک پوسٹوں کو بھی نشانہ بنایا جس کے بعد بھارتی فوج اپنی چیک پوسٹیں چھوڑ کر بھاگ گئی۔بھارت نے ذہنی طور پر شکست مانتے ہوئے اپنی چیک پوسٹوں پر سفید پرچم لہرا دیے۔اب ایک بار پھر بھارت نے پاکستان کے شہروں کو نشانہ بنانے کے لیے اپنے ناپاک عزائم کی تکمیل کے لیے ڈرون حملے کرشروع کیے مگر بھارت اس میں بھی ناکام ہو گیا۔

بھارت نے تقریبا 24 حملے پاکستان پر کیے ڈرون حملے کی جو ٹیکنالوجی بھارت استعمال کر رہا ہے یہ اسرائیلی ساخت کی ہے۔اس بات سے بخوبی اندازہ لگایا جا سکتا ہے کہ اسرائیل اور بھارت مل کر مسلمانوں کو اور مسلم ممالک کو نشانہ بنا رہے ہیں۔بھارتی فوج جو اسلحہ استعمال کر رہی ہے وہ بھی اسرائیلی ساخت کا ہے۔اسرائیل اور بھارت دونوں مسلمانوں سے دل میں کینہ رکھتے ہیں اور مسلمانوں کو اپنے ناپاک عزائم کے ذریعے شدید نقصان پہنچانا چاہتے ہیں۔

بھارت نے وہی اسٹائل اپنایا ہے جو اسرائیل نے غزہ میں اپنایا تھا۔پاکستانی حکومت اور پاکستانی پوری قوم اپنے سیکورٹی اداروں کے شانہ بشانہ کھڑے ہیں انشااللہ تعالی دشمن کبھی بھی اپنے ناک پاک عزائم میں کامیاب نہیں ہو پائے گا۔ہم بھارت کو یہ باور کرا دینا چاہتے ہیں کہ اس نے جنگ شروع کر دی ہے اب بھارت اس جنگ کے انجام کے لیے تیاری شروع کر دے۔

پاکستان سنی تحریک عالمی طاقتوں اور عالمی انسانی حقوق کی تنظیموں سے مطالبہ کرتی ہے کہ بھارت کے ان عزائم کے خلاف اس پر فوری ایکشن لیا جائے،بھارت نے جنگی قوانین کی خلاف ورزی کرتے ہوئے آبادی والے علاقوں میں میزائلوں سے حملہ کیا ہم اپنے ایک ایک پاکستانی کی شہادت کا بدلہ لیں گے۔مودی اب موزی مرض بن گیا ہے اور موزی مرض کا علاج کرنا ہمیں بخوبی آتا ہے۔

بھارت صرف فلموں اور ڈراموں میں پاکستان سے جنگ میں اپنی جیت دکھاتا ہے جبکہ حقیقت میں بھارت میں اتنا حوصلہ نہیں ہے کہ وہ پاکستانی افواج کے سامنے کھڑا ہو سکے۔پاکستانی سیکیورٹی اداروں کی صلاحیتوں سے دنیا واقف ہے۔بھارت کی جانب سے حملہ کیے جانے کے بعد ہم جواب دینے کا پورا حق رکھتے ہیں اور بھارت کو ہم کسی بھی وقت بھرپور جواب دیں گے۔اقوام متحدہ کی جانب سے اب تک بھارتی اس اقدام کے خلاف کوئی ایکشن نہیں لیا گیا ہے،کوئی بات نہیں جب پاکستان اپنا دفاع کرے گا تو پھر انہیں مرچیں نہیں لگنی چاہیے۔پریس کانفرنس کے بعد بھارت کے خلاف احتجاجی مظاہرہ بھی کیا گیا اور بھارتی جھنڈا بھی نظرآتش کیا گیا۔