استحکام پاکستان پارٹی کے سربراہ عبد العلیم خان کا آپریشن "بنیان المرصوص"کی کامیابی پر افواج پاکستان کو خراج تحسین ، قوم کو مبارکباد

ہفتہ 10 مئی 2025 16:00

اسلام آباد (اُردو پوائنٹ اخبارتازہ ترین - اے پی پی۔ 10 مئی2025ء) استحکام پاکستان پارٹی کے سربراہ عبد العلیم خان نے بھارتی جارحیت کے جواب میں آپریشن "بنیان المرصوص"کی کامیابی پر پاک افواج کو خراج تحسین پیش کیا ہے ۔ ہفتہ کو اپنے ٹویٹ میں انہوں نے کہا کہ آپریشن "بنیان المرصوص"کی کامیابی پر پاک افواج خراج تحسین کی مستحق ہیں۔ پاکستان کے جوابی حملوں نے بتا دیا کہ الحمد للہ پاکستان محفوظ اور مضبوط ہاتھوں میں ہے۔

انہوں نے کہا کہ پاکستان نے ہر ممکن تحمل کا مظاہرہ کیا لیکن دشمن ہماری امن کی خواہش کو کمزوری سمجھتا رہا۔ ہماری افواج نے دشمن کی تمام غلط فہمیاں دور کر دیں۔عبدالعلیم خان نے کہا کہ پاک فوج نے بھارت کے جدیدایس 400 دفاعی نظام کو ناکارہ بنا کر بھارتی غرور خاک میں ملا دیا ہے۔

(جاری ہے)

انشاءاللہ پوری قوم اپنی بہادر افواج کے ساتھ ہے اور مکمل یقین رکھتی ہے کہ وطن کا ایک ایک انچ محفوظ ہاتھوں میں ہے۔

نعرہ تکبیر - اللہ اکبر۔ عبدالعلیم خان نے ٹوئٹ میں یہ اشعار بھی بیان کئے، "یہ غازی یہ تیرے پرُاسرار بندے۔۔جنہیں تو نے بخشا ہے ذوق خدائی ": ''بنیان المرصوص'' کی شاندار کامیابی پر صدر آئی پی پی اور وفاقی وزیر عبدالعلیم خان نے قوم کو بھی مبارکباد دی اور کہا کہ افواج پاکستان نے 5 گھنٹوں میں 5 دنوں کا حساب چکا دیا، عبدالعلیم خان نے تہنیتی ٹویٹ میں مزید کہا کہ'' الفتح میزائل کامیابی اور نصرت کی علامت بن گیا ہے ''- وفاقی وزیر نے کہا کہ پاک فوج نے بتا دیا کہ پاکستان مضبوط اور محفوظ ہاتھوں میں ہے، پاک فضائیہ کے شاہینوں نے بھارت کی تمام غلط فہمیاں دور کر دیں۔

صدر استحکام پاکستان پارٹی نے کہا کہ مسلح افواج اور فیلڈ سٹاف کامیاب" سٹرایکس" پر مبارکباد کے مستحق ہیں۔ عبدالعلیم خان نے کہا کہ افواج پاکستان کی جنگی مہارت سے ساری قوم کے حوصلے بلند ہوئے، پاک فضائیہ نے ایک بار پھر بھارتی غرور کوخاک میں ملا دیا۔ عبدالعلیم خان نے کہا کہ امید ہے دشمن کا جنگ کا خمار کافی حد تک اتر چکا ہو گا۔