خیبرپختونخواہ حکومت کا بھارتی جارحیت میں شہید و زخمی ہونیوالوں کے ورثا کیلیے امدادی پیکیج کا اعلان

پشاور ( اُردو پوائنٹ اخبارتازہ ترین۔ 10 مئی 2025ء )خیبرپختونخواہ حکومت کا بھارتی جارحیت میں شہید و زخمی ہونیوالوں کے ورثا کیلیے امدادی پیکیج کا اعلان۔ تفصیلات کے مطابق خیبر پختونخواہ حکومت نے بھارتی جارحیت میں شہید اور زخمی ہونے والوں کے ورثا کے لیے امدادی پیکیج کا اعلان کردیا۔ وزیراعلیٰ خیبر پختونخواہ علی امین گنڈاپور نے بھارتی جارحیت کے نتیجے میں صوبے سے تعلق رکھنے والے شہدا کے ورثا اور زخمیوں کے لیے امدادی پیکیج کا اعلان ہوئے کہا کہ بھارتی جارحیت کے نتیجے میں ملک کے کسی بھی حصے میں اگر خیبر پختونخواہ سے تعلق رکھنے والا کوئی شہید یا زخمی ہوگا تو صوبائی حکومت ان شہدا کے ورثا اور زخمیوں کی بھر پور مالی معاونت کرے گی۔

علی امین گنڈاپور کا کہنا تھا کہ یہ مالی معاونت صوبائی حکومت کے ریلیف پیکیج کے تحت کی جائے گی۔

(جاری ہے)

صوبائی حکومت بھارتی جارحیت کے نتیجے میں شہید ہونے والوں کے اہل خانہ اور زخمیوں کو تنہا نہیں چھوڑے گی۔ دوسری جانب پاکستان تحریک انصاف کا کہنا ہے کہ جنگ کے ایک نیا موڑ لینے کے بعد پوری قوم متحد ہو گئی، بھارت اور اس کے مذموم عزائم کیخلاف پاکستان ضرور فتح یاب ہوگا۔

تحریک انصاف کی سیاسی کمیٹی کے اعلامیہ کے مطابق جنگ کی صورتحال میں ہونے والی حالیہ پیش رفت کے تناظر میں پاکستان تحریک انصاف کی سیاسی کمیٹی کے اجلاس میں شرکاء نے مسلح افواج کی جانب سے بھارتی جارحیت کے خلاف دیئے گئے ردعمل کو سراہا، جنگ کا پانسہ پلٹنے میں پاک فضائیہ کے کردار کو خاص طور پر سراہا گیا۔ اجلاس کو بتایا گیا کہ وزیر اعظم پاکستان نے اس سے قبل صبح کے وقت پارٹی چیئرمین کو فون کے ذریعے ملک کے خلاف بلا اشتعال بھارتی جارحیت کے نتیجے میں پیدا ہونے والے بحران کے بارے میں آگاہ کیا، چیئرمین نے انہیں بانی چیئرمین عمران خان کی سلامتی اور فلاح و بہبود کے بارے میں پارٹی کی تشویش سے آگاہ کیا، انہوں نے ان کی فوری رہائی کی ضرورت پر بھی زور دیا کیوں کہ عوام کے درمیان ان کی موجودگی انہیں متحد کرنے کے لیے اشد ضروری ہے، قومی اتحاد پاکستان کے امن اور ترقی کے ایجنڈے کو فروغ دینے کے قومی عزم کو تقویت دے گا۔

پی آئی سیاسی کمیٹی کا اعلامیہ میں کہنا ہے کہ شرکاء نے بھارت کے وحشیانہ حملے کے بعد نواز شریف، آصف علی زرداری اور حکومت کے دیگر اہم ارکان کی گہری خاموشی پر تشویش کا اظہار کیا، یہ سراسر قابل مذمت ہے کیوں کہ یہ بھارتی جارحیت کی خاموش حمایت کے مترادف ہے۔ بتایا جارہا ہے کہ پاکستان تحریک انصاف کے چیئرمین بیرسٹر گوہر خان نے پاکستان کی جانب سے بھارتی جارحیت کے خلاف شروع کیے گئے آپریشن بنیان مرصوص کی کامیابی پر مبارکباد پیش کی، بیرسٹر گوہر خان نے اپنے ایک بیان میں آپریشن بنیان مرصوص کو سراہا اور کہا کہ بھارتی جارحیت کے بعد آپریشن بنیان مرصوص ضروری تھا اور الحمدللہ بہت کامیاب ہوا، قوم متحد ہے اور بھارت کی آئندہ کسی بھی جارحیت کے خلاف متحد ہو کر کھڑی ہوگی، پاکستان زندہ باد!۔