بھارت کو یہ بات ماننی پڑے گی کہ پاکستان کی فضائی طاقت بھارت سے زیادہ ہے

اسلام آباد ( اردوپوائنٹ اخبار تازہ ترین۔ آئی پی اے ۔ 10 مئی 2025ء ) برطانوی صحافی نے جنگ میں پاکستان کی بھارت پر برتری کو تسلیم کرتے ہوئے کہا کہ بھارت کو یہ بات ماننی پڑے گی کہ پاکستان کی فضائی طاقت بھارت سے زیادہ ہے۔ میڈیا کے مطابق بی بی سی جنوبی ایشیاء کے ریجنل ایڈیٹراینبرسن اتھرجان کا کہنا ہے کہ بھارت کو یہ بات ماننی پڑے گی کہ پاکستان کی فضائی طاقت بھارت سے زیادہ ہے، بھارت کے ناقابل تلافی نقصان پہنچانے کے منصوبے کو پاکستان نے ناکام بنا دیا، بھارت نے اربوں ڈالر کا اسلحہ خریدا تھااس کے باوجود ناکامی کا سامنا کرنا پڑا۔

بھارت یہ دعویٰ کرسکتا ہے کہ اس نے پاکستانی نیوکلیئراثاثوں کے باوجود پاکستان کے اندر حملہ کیا۔ لیکن بھارت کو یہ بات ماننی پڑے گی کہ پاکستان کی فضائی طاقت بھارت سے زیادہ ہے۔

(جاری ہے)

اسی طرح میڈیا کے مطابق امریکی صحافی نک رابرٹسن کا کہنا ہے کہ بھارت نے پاکستان کی ایئربیسز پر حملہ کیا جس کے بعد پاکستان نے بھارت پر نہ رکنے والے میزائلوں کی بارش کردی۔

پاکستانی میزائل حملوں کے بعد بھارت مذاکرات کی ٹیبل پر آنے پر مجبور ہوا۔پاکستانی میزائل حملوں نے بھارت کو پیچھے ہٹنے پر مجبور کردیا۔امریکی وزیرخارجہ نے سعودی وزیرخارجہ اور ترک حکام سے رابطہ کیا جس کے بعد سفارتی طریقے سے معاملہ حل ہوا اور سیزفائرممکن ہوا۔ اس سے پہلے پوری دنیا کئی دن سے سیز فائر کرانے کی کوشش کررہی تھی ، مگر انہیں کوئی کامیابی نہیں ملی۔

 یاد رہے آج 10 مئی کو امریکی صدر ڈونلڈ ٹرمپ نے پاکستان اور بھارت کے درمیان جنگ بندی کا اعلان کیا۔ انہوں ایکس پر اپنے بیان میں کہا کہ پاکستان اور بھارت فوری طور پر سیز فائر پر متفق ہوگئے ہیں۔ انہوں نے کہا کہ امریکہ کی ثالثی میں ایک طویل بات چیت کے بعد مجھے یہ اعلان کرتے ہوئے خوشی ہو رہی ہے کہ ہندوستان اور پاکستان نے مکمل اور فوری جنگ بندی پر اتفاق کیا ہے، ذہانت اور تدبر سے کام لینے پر دونوں ممالک کو مبارکباد پیش کرتا ہوں، اس معاملے پر تمام فریقین کی دلچسپی پر شکریہ ادا کرتا ہوں۔

دوسری جانب جنگی جنون میں مبتلا بھارتی حکومت کو پاکستان کے حملوں کے نتیجے میں 83 بلین ڈالرز کا نقصان اٹھانا پڑا۔ عالمی نیوز ایجنسی رائٹرز نے رپورٹ کیا کہ پاکستان اور بھارت کے درمیان جاری کشیدگی کے باعث ہندوستانی حصص مسلسل گرنے سے مارکیٹ ویلیو میں تقریباً 83 بلین ڈالر کا نقصان ہوا کیوں کہ ہندوستان اور اس کے ہمسایہ ملک پاکستان کے درمیان عسکری کارروائی میں شدت نے سرمایہ کاروں کو پریشان کردیا، بھارت کی سٹاک مارکیٹ کے 13 بڑے شعبوں میں سے 12 شعبے شدید مندی کا شکار ہوئے، جس کے بعد سے سٹاک مارکیٹ میں شدید بے چینی کی فضا دیکھی گئی، خطے میں کشیدگی پر غیرملکی سرمایہ کاروں نے واضح طور پر تحفظات کا اظہار کیا۔