کراچی‘ بیہوشی کی حالت میں ملنے والے بزرگ سے دو بھارتی پاسپورٹ برآمد

دونوں پاسپورٹ جدہ سے جاری ہوئے ہیں اور ان پر پتہ حیدرآباد، آندھرا پردیش بھارت کا درج ہے۔

بدھ 14 مئی 2025 12:30

کراچی (اُردو پوائنٹ اخبارتازہ ترین - این این آئی۔ 14 مئی2025ء) کراچی کے مصروف ترین علاقے صدر میں واقع اللہ والی مسجد کے قریب ایک بزرگ شہری بے ہوشی کی حالت میں پائے گئے، جنہیں فوری طور پر جناح اسپتال منتقل کر دیا گیا۔ریسکیو ذرائع کے مطابق بے ہوش شخص کی شناخت 60 سالہ عبدالعزیز کے نام سے ہوئی ہے۔ تاہم ان کی اصل شناخت اور پس منظر کے حوالے سے مزید تحقیقات جاری ہیں۔

(جاری ہے)

اہلکاروں کے مطابق بے ہوش شخص کے سامان سے ایک خاتون کے نام کے دو بھارتی پاسپورٹ برآمد ہوئے ہیں۔ پاسپورٹس پر درج نام امجدی بیگم ہے، جب کہ دونوں پاسپورٹس کی میعاد 2028 تک ہے۔ پولیس کا کہنا ہے کہ دونوں پاسپورٹ جدہ سے جاری ہوئے ہیں اور ان پر پتہ حیدرآباد، آندھرا پردیش بھارت کا درج ہے۔پولیس حکام کا کہنا ہے کہ یہ جاننے کی کوشش کی جا رہی ہے کہ مذکورہ شخص کون ہے اور بھارتی پاسپورٹس اس کے پاس کیسے پہنچے۔