رافیل طیاروں کے معاہدے میں مودی کی دھماکہ خیز کرپشن کی زد میں آگئے

نئی دہلی (اُردو پوائنٹ اخبارتازہ ترین - آن لائن۔ 14 مئی2025ء) رافیل طیاروں کے معاہدے میں مودی کی دھماکہ خیز کرپشن کی زد میں آ گئے ۔ آپریشن سندور میں رافیل طیاروں کی ناکامی سے مودی کے گھمنڈ کو شدید دھچکا پہنچا ہے ۔ رافیل طیاروں کی تباہی کے بعد مودی کو ایک بار پھر رافیل ڈیل میں کرپشن اور فراڈ کے الزامات کا سامنا ہے ۔ مودی نے رافیل طیاروں کے نام پر اربوں روپے کی کرپشن کی ۔

بی بی سی کی رپورٹ کے مطابق مودی سرکار کو رافیل ڈیل میں 7.5 ملین یورو کمیشن کی ادائیگی ہوئی ۔ رپورٹ میں قیمتوں میں مبالغہ اور ڈیل کو مشکوک قرار دیا گیا ہے ۔ بھارتی اخبار نیشنل ہیریلڈ انڈیا کے مطابق یہ ادائیگی بھارتی بزنس مین سوشن گپتا کو رافیل ڈیل کے تحت 7.5 ملین یورو کی خفیہ کمیشن کے تحت ہوئی ۔

(جاری ہے)

اس سے قبل کانگریس رہنما راہول گاندھی نے بھی رافیل ڈ یل میں کرپشن پر بات کرتے ہوے کہا تھا رافیل ڈیل میں کرپشن کی گئی ہے اور اربوں ڈالر کا فراڈ کیا گیا ہے ۔

ان کا کہنا تھا رافیل ڈیل کے وقت بی جے پی حکومت کے وزیر دفاع منوہر پاریکر بھی اس ڈیل کا حصہ نہیں بنے تھے اور انہیں استعفیٰ دینا پڑا تھا۔ راہول گاندھی کا کہنا تھا انیل امبانی کی کمپنی 45 ہزار کروڑ روپے کے قرض میں ڈوبی ہوئی تھی اور اس کی مددکیلئے ہی نریندر مودی نے رافیل طیاروں کے معاہدے کا سہارا لیا۔ ان انکشافات کے بعد مودی سرکار کی جانب سے اس اہم معاملے کی تحقیقات کو نظر انداز کرنے پر کئی سوالات اٹھ گئے ہیں۔

دی وائر کے مطابق کرائم بیورو آف انویسٹیگیشن نے مودی کے کرپشن اور بدعنوانیوں کو سامنے لایا مگر مودی نے آج تک اس واقعے پر مجرمانہ خاموشی اختیار کی ۔ مودی کے خلاف کرپشن کے کیسز سامنے لانے پر سی بی اے کے ڈائریکٹر کی برطرفی اور تحقیقات آگے نہ بڑھانے پر مودی نے دھمکیاں بھی دیں ۔ دی وائر کے مطابق پائلٹس کی نااہلی اور طیاروں کی تکنیکی خامیوں نے مودی کی کرپشن کے پول کھولے ۔

بھارتی میڈیا کے مطابق مودی سرکار کے ماتحت سی بی آئی کے ڈائریکٹر نے رافیل کرپشن کیس پر تفتیش آگے نہیں بڑھائی۔ اکتوبر 2018 میں سی بی آئی کو رافیل 7.5 ملین یورو کمیشن کی ادائیگی کے ثبوت ملے تھے۔ مودی سرکار کے سیاسی دباؤ کے تحت اس اہم معاملے پر کسی قسم کی کارروائی نہیں کی گئی۔ دی وائر کے مطابق انٹرا پارٹی رپورٹ میں بھی رافیل ڈیل میں 12.8 ملین یورو رشوت کا انکشاف بھی کیا گیا۔

جبکہ سی بی آئی اور انفورسمنٹ ڈائریکٹوریٹ کے پاس رشوت کی مکمل دستاویزات موجود ہیں ۔ 12 ہزار صفحات پر مشتمل ثبوت سی بی آئی کو 2018 میں ملنے کا کہا گیا مگر مودی کی دھمکیوں اور ڈائریکٹر کی برطرفی کے باعث کارروائی عمل میں نہیں لائی گئی۔ دی وائر کے مطابق مودی سرکار نے بھارت ٹوڈے پر رافیل ڈیل کی رپورٹ چھپانے کے لیے بھی دباؤ ڈالا۔ دفاعی ماہرین کا کہنا ہے کہ انیل امبانی کی کمپنی کو فائدہ پہنچانے کے لیے بھارت نے اربوں روپے کی کرپشن کر کے ساکھ مزید کمزور کر دی۔ فرانسیسی کمپنی کے کہنے پر فرانس میں تحقیقات ہوئیں مگر بھارت میں خاموشی ہے۔ رافیل اسکینڈل نے مودی سرکار کی کرپشن کی حقیقت دنیا کے سامنے رکھ دیا ہے۔