Live Updates

عمران خان کی رہائی تک چین سے نہیں بیٹھوں گا، اعظم سواتی

مودی ہٹلر سے بھی بدتر ہے، چین نے دوستی کا حق ادا کردیا، پی ٹی آئی رہنماکی بات چیت

جمعرات 15 مئی 2025 14:50

عمران خان کی رہائی تک چین سے نہیں بیٹھوں گا، اعظم سواتی

پشاور(اُردو پوائنٹ اخبارتازہ ترین - این این آئی۔ 15 مئی2025ء)پی ٹی آئی رہنما اعظم سواتی نے کہا ہے کہ ہمارا لیڈر سلاخوں کے پیچھے ہے، عمران خان کی رہائی تک چین سے نہیں بیٹھوں گا۔عدالت میں پیشی کے موقع پر میڈیا سے گفتگو کرتے ہوئے پاکستان تحریک انصاف کے رہنما اعظم سواتی کا کہنا تھا کہ ملک کا ہر ادارہ تباہ ہوچکا ہے۔ ہمارا لیڈر جیل کی سلاخوں کے پیچھے ہے۔

خطے کی صورت حال پر بات کرتے ہوئے انہوں نے کہا کہ مودی ہٹلر سے بھی بدتر ہے جب کہ چین نے دوستی کا حق ادا کیا ہے۔

(جاری ہے)

میں دل کی گہرائیوں سے چین کے صدر کو سلام پیش کرتا ہوں۔انہوں نے کہا کہ آرمی چیف عوام کی خواہشات کی تکمیل کے لیے بانی پی ٹی آئی کو رہا کریں۔ پی ٹی آئی کے بے گناہ قیدیوں کو رہا کیا جائے۔ اپنے لیڈر کی رہائی تک چین سے نہیں بیٹھوں گا۔قبل ازیں اعظم سواتی کی جانب سے دائر توہین عدالت کی درخواست پر سماعت پشاور ہائی کورٹ کے جسٹس سید ارشد علی اور جسٹس محمد فہیم ولی نے کی، جس میں ایڈیشنل اٹارنی جنرل نے بتایا کہ عدالت کے حکم پر عملدرآمد ہوگیا ہے۔بعد ازاں عدالت نے حکم پر عملدرآمد کی رپورٹ کے بعد کیس نمٹا دیا۔